ސައޫދީ އަރަަބިއްޔާ ސަރުކާރުން މާލޭގައި އަޅައިދިން ކިންގް ސަލްމާން މިސްކިތް ނުހުޅުވާ، މިސްކިތް ވަށައިގެންވާ ޕާކިން ޒޯނެއް ހަދައި، ޖާގަތައް ކުއްޔަށް ދޭން ހުޅުވާލައިފި އެވެ.
މާލޭ ސިޓީ ކައުންސިލްގެ އިދާރާ އިން ކޮށްފައިވާ އިއުލާނެއްގައި ބުނި ގޮތުގައި ސަލްމާން މިސްކިތުގެ އުތުރު ފަރާތުގައިވާ ޕާކިން ޒޯންގައި ފީ ދައްކައިގެން ހަތަރު ފުރޮޅުލީ އުޅަނދު ޕާކުކުރުމަށް އެދި ހުށަހެޅުމުގެ ފުރުސަތު ހުޅުވާލުމުން، އެ ޒޯނުން ޖާގަ ހޯދުމަށް އެދި ހުށަހެޅި ފަރާތްތަކުގެ ތެރެއިން އެކިއެކި ސަބަބުތަކާ ހުރެ ކެންސަލްވި 27 ޖާގަ އާއި އަދި ސަލްމާން މިސްކިތުގެ ސަރަހައްދުން އަލަށް ގާއިމު ކުރި އަށް ޖާގައަށް އެދި ހުށަހެޅުމުގެ ފުރުސަތު މި މަހުގެ 15 ގެ ނިޔަލަށް ހުޅުވާލާފައިވާ ކަމަށެވެ.
މި ޒޯނުން 35 ޕާކިން ސްލޮޓް ދޫކުރާނީ މަހަކު 3000ރ. ދައްކާ ގޮތަށެވެ. އަދި މި ޒޯނުން ޖާގަ ދެނީ ކާރަށާއި 350 ކިލޯއަށް ވުރެ މަތި ނޫން ޕިކަޕު ތަކަށެވެ.
މިދިޔަ އަހަރު ނިންމިފައިވާ ސަލްމާން މިސްކިތް ހުޅުވުން ލަސްވުމުގެ ގިނަ ބަޔަކު ދަނީ ފާޑު ކިޔަމުންނެވެ.
ޕްލޭނިން މިނިސްޓްރީން މި މަހުގެ ތިންވަނަ ދުވަހު ބުނެފައިވާ ގޮތުގައި ކިންގް ސަލްމާން މިސްކިތް ހުޅުވަން ސައޫދީ ސަރުކާރާ ވާހަކަ ދައްކަމުން ދާ ކަމަށެވެ. އެ މިނިސްޓްރީން ބުނީ ސަލްމާން ރަސްގެފާނު މިސްކިތުގެ ކޮންޓްރެކްޓްގައި ހިމެނޭ ހުރިހާ މަސައްކަތްތަށްކޮށް މިހާރު ނިމިފައިވާ ކަމަށެވެ.