މާލޭގެ ކާނިވަލް ސްޓޭޖު ތަޅާލުމަށްފަހު އެތަނުގައި އާ ސްޓޭޖެއް އަޅައިދޭނެ ބަޔަކު ހޯދަން އިއުލާންކޮށްފި އެވެ.
މާލެ ސިޓީ ކައުންސިލުން އިއްޔެ ކޮށްފައިވާ އިއުލާނެއްގައި ބުނެފައިވަނީ އެ ކައުންސިލްގެ ބެލުމުގެ ދަށުގައިވާ، ކާނިވަލް ސްޓޭޖް ތަޅާލުމަށްފަހު އަމިއްލަ ތަކެތީގައި އާ ސްޓޭޖެއް ތަރައްގީކޮށްދޭނެ ބަޔަކު ހޯދުމަށް ބޭނުންވާ ކަމަށެވެ.
މި މަޝްރޫއުގެ މައުލޫމާތު ދިނުމަށް މިމަހުގެ 11 ވަނަ ދުވަހުގެ ހެނދުނު 11:00 ޖަހާއިރު ހ. ހުޅުގަލީގައި ހުންނަ އެ ކައުންސިލްގެ އެޑްމިން ސެކްޝަންގެ މީޓިން ރޫމްގައި ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ.
މިބައްދަލުވުމަށް ހާޒިރު ނުވާ ފަރާތްތަކާއި ގަޑިޖެހުމުގެ ފަހުން އަންދާސީ ހިސާބު ހުށަހަޅާ ފަރާތަތަކުގެ އާންދާސީ ހިސާބު ބަލައި ނުގަންނާނެ ކަމަށްވެސް ސިޓީ ކައުންސިލުން ބުންޏެވެ.
މިމަސައްކަތުގެ އަންދާސީ ހިސާބު ހުށަހަޅަންޖެހެނީ މިމަހުގެ 16 ވަނަ ދުވަހުގެ ހެނދުނު 11:00ގެ ކުރިންނެވެ.
މިމަސައްކަތަށް އަންދާސީ ހިސާބު ހުށަހެޅޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަންޏެވެ.
ކާނިވަލް ސްޓޭޖު ތަރައްގީ ކުރަން ހަވާލުވާ ފަރާތުން މިހާރުގެ ސްޓޭޖު ތަޅާލައި ކުނިތައް އުކާލުމާއި، ސްޓޭޖުގެ ކޮންސެޕްޓް ހެދުމާއި، އިންޖީނިއަރިންނާއި ޑްރޯވިންގްސް ތައްޔާރުކޮށް ހުއްދަތައްވެސް ހޯދަންޖެހެ އެވެ. މީގެއިތުރުން ސްޓޭޖުގެ އާ ސްޓްރަކްޗާ އާއި ސްޓޭޖުގެ އިލެކްޓްރިކް އަދި ޕްލަމްބިންގެ މަސައްކަތްތައްވެސް ކުރަންޖެހެ އެވެ.
އަލިމަސް ކާނިވަލް ހެދީ ރާއްޖޭގެ އެންމެ ފުރަތަމަ ސްކޫލު -- މަޖީދިއްޔާ ސްކޫލަށް 75 އަހަރު ފުރުމުގެ މުނާސަބަތުގައި 2004 ވަނަ އަހަރު އެވެ. ކާނިވަލް ސްޓޭޖު މިވަގުތު އާންމުކޮށް ބޭނުންކުރަނީ ސިޔާސީ ބޭނުންތަކަށެވެ.