މާލޭ ސިޓީ ކައުންސިލް އިންތިޒާމުކޮށްގެން ރޯދަ މަހު ބާއްވާ ގުރުއާން މުބާރާތާއި މަދަހަ ކިޔުމުގެ މުބާރާތުގައި ބައިވެރިވުމުގެ ފުުރުސަތު އަލުން ހުޅުވާލައިފި އެވެ.
މި މުބާރާތްތަކުގައި ބައިވެރިވުމުގެ ފުރުސަތު ސިޓީ ކައުންސިލުން ހުޅުވާލީ މިދިޔަ ނޮވެމްބަރު 30 ވަނަ ދުވަހުގެ ނިޔަލަށެވެ.
މާލެ ސިޓީ ކައުންސިލުން ބުނީ މުއްދަތު ހަމަވި ފަހުންވެސް ބައެއް ފަރާތްތަކުން މުއްދަތު އިތުރުކޮށްދިނުމަށް އެދެމުންދާތީ މިމަހުގެ 11 ވަނަ ދުވަހުގެ ނިޔަލަށް މުބާރާތްތަކުގައި ބައިވެރިވުމަށް އިތުރު ފުރުސަތެއް ދީފައިވާ ކަމަށެވެ.
ގުރުއާން ކިޔެވުމުގެ މުބާރާތް ކުރިއަށް ގެންދަން ނިންމާފައިވަނީ ދެ ގޮތްޕަކަށް ބަހާލައިގެންނެވެ. އެއީ ބަލައިގެން ކިޔެވުމުގެ ގޮތްޕާއި ނުބަލައި ކިޔެވުމުގެ ގޮތްޕެވެ. ކޮންމެ ގޮތްޕެއްގައިވެސް ތިން އުމުރުފުރާ ހިމެނެ އެވެ. އެއީ 6 އަހަރުން ދަށާއި، 9 އަހަރުން ދަށާއި 11 އަހަރުން ދަށާއި، 13 އަހަރުން ދަށާއި، 16 އަހަރުން ދަށާއި، 19 އަހަރުން ދަށެވެ.
މާލެ ސިޓީ ކައުންސިލުން ބުނީ އުމުރު ފުރާ ކަނޑައެޅުމުގައި ބަލާނީ އަންނަ އަހަރުގެ ޖެނުއަރީ އެއްވަނަ ދުވަހަށް ދަރިވަރަށް ފުރޭ އަހަރަށެވެ.
މަދަހަ މުބާރާތުގައި ބައިވެރިވެވޭ އުމުރުފުރާތަކަކީވެސް 6 އަހަރުން ދަށާއި، 9 އަހަރުން ދަށާއި 11 އަހަރުން ދަށާއި، 13 އަހަރުން ދަށާއި، 16 އަހަރުން ދަށާއި، 19 އަހަރުންދަށެވެ. މަދަހަ މުބާރާތުގައިވެސް އުމުރު ފުރާ ކަނޑައެޅުމުގައި ބަލާނީ އަންނަ އަހަރުގެ ޖެނުއަރީ އެއްވަނަ ދުވަހަށް ދަރިވަރަށް ފުރޭ އަހަރަށް ކަމަށް މާލެ ސިޓީ ކައުންސިލުން ބުންޏެވެ.
މި ދެ މުބާރާތުގައި ވަނަތަކަށް ހޮވޭ ދަރިވަރުންނަށް ސެޓްފިކެޓާއި ފައިސާގެ އިނާމެއް ދިނުމަށް ހަމަޖެހިފައިވެ އެވެ.