ޔޫއެފާ ޗެމްޕިއަންސް ލީގްގެ ގުރޫޕް އެޗް ގައި ޕީއެސްޖީ އާއި އިސްތަންބޫލް ބަޝްކްޝިއާގެ މެޗުގެ ބަދަލު ރެފްރީ އާ ހެދި މެޗު ހުއްޓާލަން ޖެހިއްޖެ އެވެ.
މެޗުގެ ބަދަލު ރެފްރީ ނުވަތަ ހަތަރު ވަނަ އޮފިޝަލަކަށް ހުރި، ރޮމޭނިއާގެ ސެބާސްޓިއަން ކޮލްޓެސްކޫ، އިސްތަންބޫލްގެ އެސިސްޓެންޓް ކޯޗް ޕިއާރް ވެބޫއަށް ނަސްލީ ގޮތުން ދިމާ ކުރުމުން މެޗުގައި ހަމަނުޖެހުންތައް ހިންގަން މެދުވެރިވި އެވެ.
ކެމެރޫންގެ ގައުމީ ޓީމަށް ކުރިން ކުޅުނު ވެބޫ އާއި ހަތަރު ވަނަ އޮފިޝަލާ ދެމެދު ހިނގި މުއާމަލާތުގައި، ވެބޫއަށް ރަތް ކާޑު ދެއްކިތަން ފެނުނެވެ، ވެބޫ ވަނީ ރެފްރީގެ ނިންމުމަކާ މެދު ހިތްހަމަނުޖެހުން ފާޅު ކޮށްފަ އެވެ. އިސްތަންބޫލްގެ ޓީމުން ތުހުމަތު ކުރަނީ ކޮލްޓެސްކޫ، ވެބޫއަށް ނިސްބަތްވާ ގޮތަށް ނަސްލީ ގޮތުން ދިމާ ކުރީ ކަމަށެވެ.
އެކަމާ ދެކޮޅަށް އިހުތިޖާޖު ކުރުމުގެ ގޮތުން، އިސްތަންބޫލްގެ ޓީމް ދަނޑުން ފޭބި އެވެ. އެ ޓީމުގެ ފަަހަތުން ޕީއެސްޖީ ވެސް އެގޮތަށް އަމަލު ކުރި އެވެ.
ކޮލްޓެސްކޫ އަކީ، މީގެ ކުރިން ވެސް ފީފާގެ ފިޔަވަޅުތަކާ ކުރިމަތިލާން ޖެހުނު ރެފްރީ އެކެވެ. ފީފާއިން ވަނީ 2007 ވަނަ އަހަރު އޭނާ ދެ ވަނަ ދަރަޖައަށް ޑީމޯޓް ކޮށްފަ އެވެ.
މެޗުގެ ބާކީ ބައި މިރޭ ކުޅޭ ގޮތަށް ޔޫއެފާއިން ވަނީ ހަމަޖައްސާފަ އެވެ. މެޗު ހުއްޓާލީ 16 މިނެޓް ކުޅެވުނު ފަހުންނެވެ. ޔޫއެފާއިން ބުނީ މައްސަލަ ތަހްގީގު ކުރަމުން ދާ ކަމަށާއި އާ އޮފިޝަލުން ތަކަކާއެކު މެޗުގެ ބާކީ ބައި މިރޭ ކުރިއަށް ގެންދާނެ ކަމަށެވެ.