މެންޗެސްޓާ ޔުނައިޓެޑްގެ ކޯޗް ކަމުގެ ވަޒީފާއަކީ އުނދަގޫ ވަޒީފާއެއް ކަމަށާއި އެ މަގާމުގައިި ހޭދަ ކުރާ ދެ އަހަރުގެ މުއްދަތުގައި އޭނާގެ ބޮލުގައި ގިނައިން ނުރަ ޖަހަން ފަށައިފި ކަމަށް ޔުނައިޓެޑްގެ ކޯޗް އޮލޭ ގަނާ ސޮލްޝަޔާ ބުނެފި އެވެ.
މިއަދަކީ، ޔުނައިޓެޑްގެ ކޯޗް ކަމާ، ސޮލްޝަޔާ ހަމަޖެއްސިތާ ދެ އަހަރު ފުރޭ ދުވަހެވެ. ސޮލްޝަޔާ ބުނީ ޝެފީލްޑް ޔުނައިޓެޑް އަތުން 3-2 ން މޮޅުވި މެޗުގައި އެކަނިވެސް ޔުނައިޓެޑްގެ ވަޒީފާއަކީ އެންމެ އުނދަގޫ އެއްވަޒީފާކަން އެނގިގެން ދިޔަ ކަމަށެވެ.
"މި ކަހަލަ މެޗުތަކުގެ ސަބަބުން އަހަރެންގެ ބޯ ކުރިއަށް ވުރެ ބޮޑަށް އަދި ކުރިއަށް ވުރެ އަވަހަށް ނުރަ ވެގެން ދިޔައަސް މި ދެއަހަރު އަހަރެން ވަރަށް ބޮޑަށް އެންޖޯއީ ކޮށްފިން،" އުމުރުން 47 އަހަރުގެ ސޮލްޝަޔާ ބުންޏެވެ. "މި ދެ އަހަރު ތެރޭ އަހަރެން ކުރީ ކޮންކަމެއްތޯ ނުވަތަ އަހަރެމެން މިތިބީ ކިހާ ހިސާބެއްގައިތޯއާ މެދު ވާހަކަ ދައްކަން އަހަންނަށް ކަމަކު ނުދޭ. އަހަރެން އަބަދުވެސް ބަލަނީ ކުރިއަށް. އަހަރެމެން ދާން ބޭނުންވާ ލެވަލްއަށް ދިއުމަށް އަދިވެސް ވަރަށް ބައިވަރު މަސައްކަތް ކުރަން ހުރިކަން އަހަންނަށް އެނގޭ. އެއީ އަހަރެމެން ކޮންމެ ދުވަހަކު މިކުރާ މަސައްކަތަކީ."
މާދަމާ ލީޑްސް ޔުނައިޓެޑާ ދެކޮޅަށް އޯލްޑްޓްރަފާޑްގައި ކުޅެން ޖެހޭ މެޗަށް ކޮންމެވެސް ވަރަކަށް ސަޕޯޓަރުން ވައްދަން ޔުނައިޓެޑުން ދަނީ މަސައްކަތް ކުރަމުންނެވެ. ސޮލްޝަޔާ ބުނީ، ދަނޑަށް ވެއްދޭ ސަޕޯޓަރުންގެ އަދަދު މަދުވިޔަސް ސަޕޯޓަރުންގެ ކުރިމަތީގައި ކުޅެން ފުރުސަތު ލިބުމަކީ ހިތްހަމަ ޖެހޭ ކަމެއް ކަމަށެވެ.