ނައިބު ރައީސް އަހުމަދު އަދީބް ހައްޔަރު ކުރެއްވުމަކީ މިހާތަނަށް ނިންމެވި އެންމެ އުނދަގޫ ނިންމެވުން ކަމަށް ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ޕީޕީއެމްގެ ޕާލިމެންޓްރީ މެންބަރުންގެ ވައިބާ ގްރޫޕުގައި މެންބަރުންނާ މުހާތަބުކުރައްވައި ރައީސް ވިދާޅުވީ، "ފިނިފެންމާ" ލޯންޗުކޮޅުގެ ތަހުގީގަށް އެމަނިކުފާނުގެ އެންމެ ގާތް އެކުވެރިއެއްގެ އުސޫލުން މަސައްކަތްޕުޅުކުރެއްވި ނައިބު ރައީސް އަހުމަދު އަދީބު ހައްޔަރު ކުރަން ހުއްދަ ދެއްވަން ނިންމެވި ނިންމެވުމަކީ މިހާތަނަށް އެމަނިކުފާނު ނިންމެވި އެންމެ އުނދަގޫ ނިންމެވުން ކަމަށެވެ.
ރައީސް މިހެން ވިދާޅުވި ނަމަވެސް އަދީބް ހައްޔަރުކުރުމާއި ގުޅިގެން ރަސްމީ ސިފައެއްގައި އެއްވެސް ވާހަކަފުޅެއް ރައީސް އަދި ނުދައްކަވައެވެ.
ރައީސް އޮފީހުން ބުނީ މިހާރުގެ ހާލަތާއި ގުޅިގެން ރައީސް ގައުމާއި މުހާތަބުކުރައްވާނީ މާދަމާ ކަމަށެވެ.
ރައީސްގެ ފުރާނަފުޅަށް ގެއްލުންދޭން މަސައްކަތްކުރުމުން ބަޣާވާތުގެ ތުހުމަތުކޮށް މިއަދު ފުލުހުން ނައިބު ރައީސް ހައްޔަރުކޮށްފައިވަނީ ޗައިނާ އަށް ކުރެއްވި ރަސްމީ ދަތުރުފުޅަކަށް ފަހު ކުއްލި ގޮތަކަށް ސިންގަޕޫރަށް ވަޑައިގަތުމަށްފަހު އެނބުރި މާލެ ވަޑައިގަތުމުން އެއާޕޯޓުންނެވެ.
އަދީބު މިހާރު ވަނީ ތަހުގީގަށް ދޫނިދޫގައި ބަންދުކޮށްފައެވެ.
