ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާ ކުރުމުގެ ގާނޫނަށް މިދިޔަ މަހު އިސްލާހު ގެނައި ފަހުން ތޫނު އެއްޗެއް ބޭނުންކޮށްގެން މާރާމާރީ ހިންގި މީހެއްގެ މައްޗަށް ހަ ދުވަސް ތެރޭގައި ދައުވާކުރަން ކޯޓަށް މިއަދު ފޮނުވައިފި އެވެ.
ޕްރޮސެކިއުޓާ ޖެނެރަލް(ޕީޖީ) އޮފީހުން މިއަދު ދައުވާކުރަން ކްރިމިނަލް ފޮނުވީ މިދިޔަ ހަފުތާގެ ތެރޭގައި ވިލިމާލޭގައި ފުލުހަކަށް ވަޅިން ހަމަލާދިން މީހާގެ މައްޗަށެވެ. އުމުރުން 36 އަހަރުގެ އެ މީހާގެ މައްޗަށް ދައުވާކުރަނީ މިދިޔަ މަހު ގާނޫނަށް ގެނައި އިސްލާހުގެ ދަށުން ކަމަށް ފުލުހުން ބުނި ނަމަވެސް އޭނާގެ މައްޗަށް ކުރަނީ ކޮން ދައުވާއެއް ކަން މިހާތަނަށް ސާފެއް ނުވެއެވެ.
މިމަހުގެ ހަތް ވަނަ ދުވަހު ހިނގި އެ ހާދިސާގެ ތަހުގީގު ނިންމައި، ފުލުހުން ޕީޖީއަށް މައްސަލަ ފޮނުވީ މިމަހުގެ 10 ވަނަ ދުވަހު އެވެ.
މިދިޔަ މަހު ތަސްދީގުކޮށް އަމަލުކުރަން ފެށި އެ އިސްލާހު ބުނާގޮތުން އެ ގާނޫނުގައި ބަޔާންކުރާ ކުށްތަކުގެ ތުހުމަތުގައި ހައްޔަރުކުރާތާ ގިނަވެގެން 15 ދުވަސް ތެރޭގައި ދައުވާކުރަން ޖެހެ އެވެ. އަދި ކޯޓަށް މައްސަލަ ފޮނުވާތާ 30 ދުވަހުގެ ތެރޭގައި މައްސަލަ ނިންމަން ވެސް އެ އިސްލާހުގެ ސަބަބުން ލާޒިމްވެ އެވެ.
އަވަސް އަށް އެނގިފައިވާ ގޮތުގައި އެ އިސްލާހު ގެނައި ފަހުން އެ އިސްލާހުގެ ދަށުން ފުރަތަމަ ފަހަރަށް މީހެއްގެ މައްޗަށް ދައުވާ އުފުލީ މިދިޔަ މަހުގެ ފަހުކޮޅު ލ. ގަމުގައި އުމުރުން ދުވަސްވީ މީހެއްގެ ގައިގައި ގާބުރިއަކުން ޖެހި މައްސަލައިގައި ހައްޔަރުކުރި މީހުންގެ މައްޗަށެވެ. އެ ދެ މީހުންގެ މައްޗަށް ދައުވާކޮށް، ލ. އަތޮޅު ކޯޓުގައި އެ މައްސަލަ ހިނގަމުންދާ ނަމަވެސް އެ މީހުންގެ މައްޗަށް ވެސް ކުރި ދައުވާ މިހާތަނަކަށް ސާފެއް ނުވެއެވެ.
ސަރުކާރުގެ ފަރާތުން ގާނޫނަށް ހުށަހެޅި އެ އިސްލާހު މަޖިލީހުން ފާސް ކުރިއިރު ބޮޑެތި އަދަބުތަކެއް ހިމަނައި، ގިނަ ހައްގުތަކެއް ހިފަހައްޓާފައިވެ އެވެ.