ފެމިލީ މިނިސްޓަރު ކަމުން އިސްތިއުފާ ދެއްވެވިތާ މިއަދަށް އެއް އަހަރުވެފައިވާ ކަމަށާއި މި ސަރުކާރު އޭނާ މަގުމަތިކޮށްލި އިރު ރައީސް އިބްރާހިމް މުހައްމަދު ސޯލިހާއި ސަރުކާރު ކޯލިޝަންގެ ލީޑަރުން ލަދުގަންނަން ޖެހިވަޑައިގަންނަވާނެ ކަމަށް ކުރީގެ މިނިސްޓަރު ޝިދާތާ ޝަރީފު ވިދާޅު ވެއްޖެ އެވެ.
ޝިދާތާ މިއަދު ވަނީ އޭނާ ވަޒީރު ކަމުން އިސްތިއުފާ ދެއްވެވިތާ އެއް އަހަރު ފުރުނު ހަނދާން މިއަދު އާ ކުރައްވާފަ އެވެ. ފެމިލީ މިނިސްޓަރު ކަމުން ޝިދާތާ އިސްތިއުފާ ދެއްވެވީ ފެބުރުއަރީ 6 2020 ގައެވެ.
އޭނާ ވިދާޅުވީ ސިޔާސީ ހަލަބޮލި ކަމުގެ ތެރެއިން މި ސަރުކާރު ގެންނަން އެންމެ ބުރަ މަސައްކަތތް ކުރެއްވި އެކަކަށް އޭނާ ވެވަޑައިގަންނަވާނެ ކަމަށާއި މި ސަރުކާރު ގެނައީ އަނިޔާވެރިކަން ނިމުމަކަށް ގެނެސް އިންސާފު ގާއިމު ކުރަން ކަމަށެވެ.
ޝިދާތާ ވިދާޅުވީ އެގޮތަށް ސިޔާސީ ކަންކަން ހިނގައި ދިޔަ ނަމަވެސް އޭނާ އަމިއްލައަށް ގެނައި ސަރުކާރުގެ އެންމެ ބޮޑު ބޭއިންސާފަކާއި ހިތްދަތި ކަމަކާއި ކުރިމަތިލާން ޖެހި ވަޑައިގެންނެވި މީހަކީ އޭނާ ކަމަށެވެ.
"ކޯލިޝަންގެ ހުރިހާ ޕާޓީއެއްގެ ލީޑަރުންގެ ހައްގުގައި ބިރެއް ނެތި ވަކާލާތު ކުރިން. މިއަދު އަޅުގަނޑު މަގުމަތިކޮށް ބާކީ ކުރުމަކީ ރައީސް ސޯލިހު ހިމެނޭހެން ކޯލިޝަންގެ ހުރިހާ ލީޑަރުން ލަދުގަންނަން ޖެހޭ ކަމެއް. އެހެނަސް ސިޔާސީ ގޮތުން ފަހަތަށް ޖެހުމުގެ ވިސްނުމެއް ނެތް. ދާނީ ކުރިޔަށް، އިންޝާ ﷲ" ޓްވިޓާގައި އޭނާ ލިޔުއްވާފައި ވެއެވެ.
ޝިދާތާ އިސްތިއުފާ ދެއްވާފައިވަނީ ކުޑަ ކުދިންނާ ގުޅޭ ގިނަ މައްސަލަތަކުގައި އިހުމާލުވެ ވަޑައިގެންނެވި ކަމަށް ބުނެ ރައްޔިތުންގެ މަޖިލީހުގައި އެމްޑީޕީގެ ގިނަ މެންބަރުން ޝިދާތާ އިސްތިއުފާ ދެއްވުމަށް ގޮވާލާފައި ވަނިކޮށެވެ.
އަދި ޝިދާތާ މަގާމުގައި ހުންނަވަން ނުފެންނަ ކަމަށް، މަޖިލީހުގެ ސާފު މެޖޯރިޓީ އޮންނަ، އެމްޑީޕީގެ ޕާލިމަންޓަރީ ގްރޫޕުގެ އިއްތިފާގުން ފާސްކޮށްފައި ވެސް ވަނިކޮށެވެ.