ބޮޑު އާބާދީއެއް އޮތް ވެރިރަށް މާލެ ކައިރިން ފަޅެއް ހިއްކައިގެން ދިވެހިން ދަތުރުދާން ރަށެއް ތަރައްގީ ކުރުމުގެ މަސައްކަތް ނުނިމި ދިގުލައިގެން ދިޔަނަމަވެސް އެ މަސައްކަތް އެބަ ހިނގާ ކަމަށް ސަރުކާރުން ބުނެފި އެވެ.
މާލެ ކައިރީ ދަތުރު ދާ ރަށެއްގެ ގޮތުގައި އެނބޫދޫ ފަޅުގައި ހިއްކި ރަށެއް ހަމަޖައްސަައި އެ ރަށް 2020 ވަނަ އަހަރު ކުރީކޮޅު ހުޅުވާލާނެ ކަމަށް ރައީސް އިބްރާހިމް މުހައްމަދު ސޯލިހް އޭޕްރީލް 2، 2019 ގައި ވަނީ ވިދާޅުވެފައެވެ. މިއީ ރައީސް އިބްރާހިމް މުހައްމަދު ސޯލިހްގެ ފުރަތަމަ 100 ދުވަހުގެ ތެރޭގައި ފުއްދަވާނެ ކަމަށް ވިދާޅުވެ ވެވަޑައިގެންނެވި ވައުދެކެވެ.
އެކަމާ ގުޅޭގޮތުން ސަރުކާރުގެ ތަރުޖަމާން މުހައްމަދު މަބުރޫކް އަޒީޒު ވިދާޅުވީ އެ މަސައްކަތަކީ ޕްލޭނިން މިނިސްޓްރީން މިދިޔަ އަހަރު ނިންމަން އޮތް ޕްރޮޖެކްޓެއް ކަމަށާ އެ މަސައްކަތް ނުނިމި ދިގުލައިގެން ގޮސްފި ކަމަަށެވެ. ޕިކްނިކް އައިލެންޑް ހުޅުވޭނެ އާ ތާރީހެއް ބުނަން އަދި ނޭންގޭ ކަމަށާ ނަމަވެސް އެ ރަށް ހެދުމުގެ މަސައްކަތް ކުރިއަށް ގެންދަން ސަރުކާރުން ބޭނުންވާ ކަމަށް ވިދާޅުވިއެވެ.
"ޕިކުނިކް އައިލެންޑެއްގެ ބޭނުން ހިފަން ފަށާނީ އިރާދަކުރެއްވިއްޔާ މި ވެކްސިން ޖަހާ ނިމި ކޮވިޑްގެ މި ކަމުގެ ތެރެއިން އަރައިގެންވިގެން. އެހާތަނަށް އަންނަންވާއިރަށް މިކަމުގެ ގިނަ މަސައްކަތްތަކެއް ހުންނާނީ ކުރެވިފައި،" މަސައްކަތް އޮތް ހިސާބެއްގެ އެއްވެސް މައުލޫމާތެއް ނުދެއްވާ އެ މައުލޫމާތު ސާފުކުރެއްވުމަށްފަހު ހިއްސާ ކޮށްލަވާނެ ކަމަށް މަބުރޫކް ވިދާޅުވިއެވެ.
ދަތުރުދާ ރަށާ ގުޅޭގޮތުން ރައީސް ކުރިން ވިދާޅުވީ ސިންވާ ކުންފުނިން އެ ރަށް ތަރައްގީ ކޮށްދެނީ ޕިކްނިން އައިލެންޑަކުން ލިބެން ހުންނަ ޒަމާނީ ހުރިހާ ލުއިފަސޭހަ ތަކާއެކު ކަމަށެވެ.
"އާއިލާތައް އެކުގައި ގޮސް އުޅެވޭނެ އިންތިޒާމުތައް ހުންނާނެ، މުނިފޫހިފިލުވުމުގެ ހަރަކާތްތައް ކުރިއަށްގެންދާ ޖާގަވެސް އޮންނާނެ. ކުޑަކުދިންނަށް ހާއްސަ ކުރެވިފައިވާ ތަންތަނާއި އިންތިޒާމްތައްވެސް ހަމަޖެހިފައި ހުންނާނެ. އަޅުގަނޑުމެން ގަސްތުކޮށްފައިވަނީ އެންމެ ލަސްވެގެން އަންނަ އަހަރުގެ ކުރީކޮޅު އެރަށަށް ދަތުރު ދެވޭ ވަރު ކުރުމަށް،" ރައީސް ވިދާޅުވި އެވެ.
ރައީސް އިތުރަށް ވިދާޅުވީ، މާލޭ މީހުން ދިރިއުޅެމުން އައި ހާސް ކަމުގެ ތެރެއިން ހިތް އުފާ ކޮށްލާ މުނިފޫހި ފިލުވާލުމަށް މީގެ ކުރިން ގޮސް އުޅުނީ މާލެ މާލެ އާ ކައިރި ފަޅުރައްތަކާއި ފިނޮޅުތަކަށް ކަމަށެވެ. އަދި މާލޭގައި ދިރިރިއުޅޭ މީހުންގެ އިހުސާސްތަކަށް ބެލުމެއް ނެތި، މާލޭ ސަރަހައްދުގެ ހުރިހާ ފަޅުރައްތައް ކުރީ ސަރުކާރުން ވަނީ ނާޖާއިޒު ގޮތުގައިި ވިއްކާ ހުސްކޮށްފަ ކަމަށެވެ.
"އާއިލާއާއި އެކުވެރިންނާއި އޮފީސް މުވައްޒަފުންނާއެކު މަޖާ ކޮށްލުމަށް ދަތުރު ދިއުމަކީ ދިވެހިން، ވަކިން ހާއްސަކޮށް މާލޭގެ ދިރިއުޅޭ މީހުންގެ އުފަލެއް. ނަމަވެސް، މާލޭގެ ދިރިއުޅޭ މީހުންގެ އިހުސާސް ތަކަށް ބެލުމެއް ނެތި އަދި އެކަން ނުކުރަށް އެދި އަޑުއުފުލަމުން ދަނިކޮށްވެސް މި ސަރަހައްދުގެ ހުރިހާ ފަޅު ތަކާއި ފިނޮޅު ތަކާއި ފަޅުރައްތައް ކުރީ ސަރުކާރުން ވަނީ ނާޖާއިޒު ގޮތުގައި ވިއްކާ ހުސްކޮށްލާފަ،" ރައީސް ވިދާޅުވި އެވެ.
މާލެ ކައިރިން ފަޅެއް ހިއްކައިގެން ދިވެހިން ދަތުރުދާން ރަށެއް ތަރައްގީ ކުރުމަށް ކުރީ ސަރުކާރުންވެސް މަަސައްކަތް ކުރިއެވެ. އެ މަސައްކަތް ކުރަމުންދާ ކަމަށް މޯލްޑިވްސް އިންޓަގްރޭޑެޑް ޓޫރިޒަމް ޑިވްލޮޕްމެންޓް ކޯޕަރޭޝަން (އެމްއައިޓީޑީސީ) އިން ހާމަކުރީ ޖަނަވަރީ 4، 2017 ގައެވެ.
ކުރީ ސަރުކާރުން މަސައްކަތް ކުރީ 2017 ގެ ކުރިން ރަށުގެ މަސައްކަތް ނިންމާށެވެ. ނަމަވެސް ނޮވެންބަރު 17، 2018 ގައި ވެރިކަން ނިމުމުއިރުވެސް އެ މަސައްކަތް އޮތީ އެގޮތުގައެވެ.