ކުރިއަށް އޮތް ލޯކަލް ކައުންސިލްތަކުގެ އިންތިހާބާއި ކައުންސިލްތަކުގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވޯޓު ދިނުމުގެ ހައްގު ލިބިގެންވާ މީހުން ލިސްޓަށް މިހާތަނަށް 24 ޝަކުވާއެއް ހުށައެޅިފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
ކައުންސިލް އިންތިހާބު ބާއްވަން ނިންމާފައި ވަނީ އަންނަ އޭޕްރީލް މަހުގެ 10 ވަނަ ދުވަހު އެވެ.
އިލެކްޝަންސް ކޮމިޝަނުން ވަނީ ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީ އާންމު ޝަކުވާ ހުށައަޅަން ފުރުސަތު ހުޅުވާލާފައެވެ. މި ރަޖިސްޓަރީއަށް މި މަހުގެ 20 ވަނަ ދުވަހުގެ ނިޔަލަށް ޝަކުވާ ހުށައެޅެ އެވެ.
ކޮމިޝަންގެ ރައީސް އަހުމަދު ޝަރީފް އާދަމް މިރޭ ވިދާޅުވީ ވޯޓާސް ލިސްޓަށް މިހާތަނަށް 24 ޝަކުވާއެއް ހުށައަޅާފައިވާ ކަމަށެވެ. ޝަކުވާތައް ޖަވާބުދީ ލިސްޓް އިސްލާހު ކުރަމުންދާނެ ކަމަށްވެސް ވިދާޅުވިއެވެ.
ވޯޓާސް ރަޖިސްޓަރީ ދިވެހި ސަރުކާރުގެ ގެޒެޓް އާއި ކޮމިޝަނުގެ ވެބްސައިޓް އަދި މާލެ ފިޔަވައި މީހުން ދިރިއުޅޭ ކޮންމެ ރަށެއްގެ ރަށު ކައުންސިލް އިދާރާއިންނާއި ސިޓީތަކުގެ ކައުންސިލް އިދާރާ / އަވަށު އޮފީހުން އާންމުކޮށް ފެންނަން ހުންނާނެއެވެ. ރަސްމީ ބަންދު ނޫން ކޮންމެ ދުވަހަކު ހެނދުނު 8:30 އިން މެންދުރު ފަހު އެކަކަށް ޝަކުވާ ހުށައެޅޭނެ އެވެ. ރަސްމީ ބަންދު ދުވަސްތަކުގައި ހެނދުނު 9:00 ކުން މެންދުރު ފަހު 1:00 އަދި ހުކުރު ދުވަހު މެންދުރުފަހު ވެސް ޝަކުވާ ހުށައެޅެ އެވެ.
ޝަކުވާ ބަލައިގަންނާނީ ޝަކުވާ ފޯމަކުންނެވެ. ޝަކުވާ ފޯމު އިލެކްޝަންސް ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެ އެވެ.