ރާއްޖެއިން ބޭރުގައި ހިންގާ ޓެރަރިސްޓް ޖަމާއަތްތަކާއި، ހަނގުރާމަވެރި ޖަމާއަތްތަކުގައި ބައިވެރިވުމަށް ދިވެހިން ރެކްރޫޓްކޮށް، ހަނގުރާމަތަކަށް މީހުން ފޮނުވަމުންދިޔަ ކަމަށް ތުހުމަތުކޮށް ހައްޔަރުކޮށްފައިވާ މުހައްމަދު އަމީންގެ ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން ނިންމި ނިންމުން ބާތިލުކޮށް ގޭ ބަންދަށް ބަދަލު ކުރި މައްސަލައާ ގުޅިގެން އެ ނިންމުން ނިންމި ފަނޑިޔާރުގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އަށް ހުށައަޅައިފި އެވެ.
އަމީން ގޭ ބަންދަށް ބަދަލު ކުރުމަށް ނިންމީ ކްރިމިނަލް ކޯޓްގެ އިސްގާޒީ އަހުމަދު ޝަކީލެވެ. ޝަކީލް އިސް ގާޒީއަކަަށް އައްޔަން ކުރެއްވީ ނޮވެންބަރު 26، 2002 ގައެވެ.
އަމީން ގޭ ބަންދަށް ބަދަލުކުރީ އޭނާއަށް އެކަށީގެންވާ ބޭސްފަރުވާ ނުލިބޭ ކަމަށް ބުނެ ހުށައެޅި މައްސަލަ ބެލުމަށްފަހު އެވެ.
ޓެރަރިސްޓެއްގެ ގޮތުގައި ބަލާ އަމީން ޝަރީއަތް ނިމެންދެން ޖަލުގައި ބަންދު ކުރަން އަމުރުކުރީ ޑިސެންބަރު 15، 2019 ގައެވެ.
އަމިއްލަ ފަރާތަކުން ޖޭއެސްސީއަށް ހުށައެޅި މައްސަލާގައި ބުނެފައިވަނީ އެކަށީގެންވާ ބޭސްފަރުވާ ނުލިބޭ ކަމަށް ބުނެ ޓެރަރިޒަމްގެ ސީރިއަސް ތުހުމަތުތަކެއް ކުރެވޭ އަމީން ގޭ ބަންދަށް ބަދަލުކުރީ ގާނޫނު އަސާސީއާ ހިލާފަށް ކަމަަށެވެ. އަދި ބޭސްފަރުވާ ނުލިބޭ ކަމަށް ބުނެ އެ މައްސަލަ ހުށައެޅީ ޖަލު ބަންދަށް ލުއި ހޯދުމަށް ކަމަށްވެސް ބުނެފައިވެއެވެ.
އަމީންއަކީ ދުނިޔެއިންވެސް ޓެރަރިސްޓެއް ކަމަށް ކަނޑައަޅާފައިވާ މީހެއް ކަމަށާ އެފަދަ މީހަކަށް ލުއި ދިނުމަކީ ޓެރިޒަމްގެ އަމަލު ހިންގުމަށް ވާގިދިނުމެއް ކަމަށާ މިފަދަ ނިންމުމެއް ނިންމީ މުޖްތަމައުގެ ސަލާމަތާއި ރައްކާތެރިކަމަށް ބެލުމަށް ފަހު ނޫން ކަމަށެވެ.
ގާޒީ ޝަކީލުގެ އެ އަމަލަކީ އޭނާގެ ސުލޫކީ މައްސަލައެއް ބަލަން ޖެހޭ ފަދަ މައްސަލައެއް ކަމަށް ބުނެ ޝަކީލްގެ މައްސަލަ ޖޭއެސްސީން ބަލައިދިނުމަށް އެދިފައިވެއެވެ.
ޏ. ފުވައްމުލައް، މާދަޑު، ކަރިއްޔާވިލާ، އަމީންގެ މައްޗަށް އުފުލާފައި ވަނީ ޓެރަރިސްޓް ޖަމާއަތެއްގައި ބައިވެރިވުމުގެ ކުށުގެ ދައުވާއާއި ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާ އެވެ.
އަމީންއާ ބެހޭ ގޮތުން ފުލުހުން ބުނެފައި ވަނީ އޭނާއަކީ ވަރަށް ގިނަ ދުވަސްވަންދެން ފުޅާ ދާއިރާއެއްގައި ރާއްޖެއިން ބޭރުގައި ހިންގާ ޓެރަރިސްޓް ޖަމާއަތްތަކާއި ހަނގުރާމަވެރި ޖަމާއަތްތަކުގައި ބައިވެރިވުމަށް ދިވެހިން ރެކްރޫޓްކޮށް، ހަނގުރާމަތަކަށް މީހުން ފޮނުވާ އެފަދަ ޖަމާއަތްތަކަށް އެހީތެރިވެދީ ވާގިވެރިވާ ކަމަށް ތުހުމަތު ކުރެވޭ މީހެއް ކަމަށެވެ.
އަދި ދުނިޔޭގެ އެކި ގައުމުތަކުގައި ހަރަކާތްތެރިވާ ޓެރަރިސްޓް ޖަމާއަތްތަކުގެ އިސް ފަރާތްތަކާއި ގާތްގުޅުމެއް ބާއްވާ އެފަދަ ޖަމާއަތްތަކުގެ ހަރަކާތްތައް ކުރިއަށް ގެންދިއުމުގައި އަމީން އިސްކޮށް ހަރަކާތްތެރިވާ ކަމަށް ވެސް ފުލުހުން ބުނެފައިވެ އެވެ.
އުމުރުން 35 އަހަރުގެ އަމީންއަކީ ސަލްޓަން ޕާކް ބޮމުގެ ހަމަލާއާއި ގުޅިގެން ފުލުހުން ހޯދި މީހެކެވެ. ނަމަވެސް އޭނާ ވަނީ ރާއްޖެއިން ބޭރަށް ފިލައިގެންގޮސް ގިނަ ދުވަސްތަކެއް ވަންދެން އުޅެފައެވެ. އެފަހަރު އޭނާ ހައްޔަރުކުރީ ރެެޑް ނޯޓިސް ނެރެގެން ލަންކާގައި ހުއްޓައެވެ. ހައްޔަރުކޮށްގެން ރާއްޖެ ގެނެސް އެފަހަރު އޭނާ ވަނީ ދޫކޮށްލާފައެވެ.
އެމެރިކާ ފަދަ ދުނިޔޭގެ ބޮޑެތި ގައުމުތަކުގެ ޓެރަރިސްޓުންގެ ލިސްޓުގައިވެސް އަމީން ހިމެނެއެވެ.