ތެލްއަވީވް (ސީއެންއެން) - އެތައް މިލިއަން ޔަހޫދީންނެއް މަރާލި ހޮލަކޯސްޓް ހާދިސާގެ ޒިންމާ މުސްލިމް މުފްތީއެއްގެ ބޮލުގައި އަޅުވައި އިޒްރޭލުގެ ބޮޑުވަޒީރު ދެއްކެވި ވާހަކައިގެ ރާގު ބަދަލު ކުރައްވައިފިއެވެ.
ނަތަންޔާހޫ ކުރިން ވިދާޅުވީ ޔަހޫދީން މެރުމަށް އެޑޮލްފް ހިޓްލަރަށް ހިޔާލު ދެއްވީ އޭރު ގުދުސްގެ އިސް މުފްތީ އަކަށް ހުންނެވި ހައްޖު އަމީން އަލް ހުސައިނީ ކަމަށެވެ. ނަތަންޔާހޫގެ މި ވާހަކައަށް މުސްލިމުންނާއި ޔަހޫދީންނާއި ތާރީހު ދިރާސާކުރާ ފަރާތްތަކުގެ ފާޑުކިޔުން ވަރަށް ބޮޑަށް އަމާޒުވިއެވެ. މިގޮތުން، މުސްލިމުން ދެކެ އަންނަ ރުޅިއެއްގެ ބޮޑުކަމުން އެތައް މިލިއަން ބަޔަކު މެރި އެޑޮލްފް ހިޓްލަރު ހިމާޔަތްކޮށް ވާހަކަ ދައްކަވަން ވެސް ނަތަންޔާހޫ ފަސްޖެހިވަޑައިނުގަންނަވާ ކަމަށް ބައެއް ފަރާތްތަކުން އޭރު ބުނަމުންދިޔައެވެ.
ނަތަންޔާހޫގެ ފޭސްބުކް ޕޭޖުގައި އޭނާ ވިދާޅުވީ އިސް މުފްތީ އާއި ހިޓްލަރުގެ ބައްދަލުވުމުގެ ވާހަކަ އޭނާ ވިދާޅުވިޔަސް ޔަހޫދީން މެރުމުގެ ހިޔާލަކީ މުފްތީގެ ހިޔާލެއް ކަމަށް ވިދާޅު ނުވާ ކަމަށެވެ. އަދި އެއީ ނާޒީންގެ އަމިއްލަ ނިންމުމެއް ކަމަށް ވެސް އޭނާ ވިދާޅުވިއެވެ.
މިދިޔަ މަހު އޮތް ޒަޔަނިސްޓް ކޮންގްރެސްގައި ނަތަންޔާހޫ ވިދާޅުވީ ހިޓްލަރު ބޭނުންވީ ޔަހޫދީން ޔޫރަޕުން ފައްސާލަން ކަމަށާއި މަރާ ހުސްކުރަން ނޫން ކަމަށެވެ. އެކަމަކު އެހެން ހެދިޔަސް ޔަހޫދީން އެނބުރި އަންނާނެ ކަމަށާއި ހައްލަކީ ޔަހޫދީން އަންދާ ހުސްކުރުން ކަމަށް ބުނެ ހިޓްލަރަށް ހިޔާލުދިނީ މުފްތީ ހުސައިނީ ކަމަށް އެ ކޮންގްރެސްގައި ނަތަންޔާހޫ ވިދާޅުވިއެވެ.
ތާރީހު ދިރާސާ ކުރާ ފަރާތްތަކުން ބުނާ ގޮތުގައި އެޑޮލްފް ހިޓްލަރު މެރި މީހުންގެ އަދަދު އެގާރަ މިލިއަނަށް އަރައެވެ. އޭގެ ތެރެއިން ހަ މިލިއަން މީހުންނަކީ ޔަހޫދީންނެވެ.
އިޒްރޭލްގެ ބޮޑު ވަޒީރު ނަތަންޔާހޫ: ކުރިން ދެއްކެވި ވާހަކަ ބަދަލު ކުރެއްވި