"ފިނިފެންމާ" ގައި ރައީސް އަބްދުﷲޔާމީނަށް އަމާޒުކޮށް ދިން ހަމަލާގެ ތަހުގީގު ކުރިޔަށްދާއިރު އެއާ ގުޅިގެން ފުލުހުން ތަހުގީގު ކުރާ އެހެނިހެން މައްސަލަތަކާއެކު ޚިދުމަތުގައި ތިބި އިތުބާރާ ޔަގީންކަން ގެއްލޭފަދަ ކަންކަން ބައެއްފުލުހުން ހިނގާފައި ހުރިކަން ހާމަވެފައިވާތީ އެފަދަ ފަރާތްތަކާމެދު އަވަސް ފިޔަވަޅުތައް އަޅަން ފަށާފައިވާ ކަމަށް ފުލުހުން ބުނެފި އެވެ.
ފުލުހުންގެ ވެބްސައިޓްގައި މިއަދު ޝާއިއު ކުރި ލިޔުމެއްގައި ބުނެފައި ވަނީ ރައްޔިތުންގެ ފުރިހަމަ އިތުބާރާ އިޙްތިރާމާއި ލޯބި ފުލުހުންނަށް ލިބުމަކީ ލިބޭނެ އެންމެ ބޮޑު ހިއްވަރު ކަމަށެވެ. އަދި ބުނެފައި ވަނީ ރިޔާސީ ލޯންޗް ކޮޅު "ފިނިފެންމާ" ގައި ހިނގި ނުރައްކާތެރި ހާދިސާގެ ތަހުގީގު ކުރިޔަށްދާއިރު އެ ތަހުގީގާއި އެއާ ގުޅިގެން ފުލުހުން ބަލާ އެހެނިހެން މައްސަލަތަކާ ގުޅިގެން ފުލުހުންގެ ޚިދުމަތުގައި ތިބި ބައެއް ފުލުހުންގެ ފަރާތުން ރައްޔިތުންގެ އިތުބާރާ ޔަގީންކަން ގެއްލޭފަދަ ކަންކަން ހިނގާފައި ހުރިކަން ވަނީ ހާމަވެގެން ގޮސްފައިވާ ކަމަށެވެ.
"ފުލުހުންނާ ގުޅުންހުރި މައްސަލަތައް ޕްރޮފެޝަނަލް ސްޓޭންޑަޑްސް ކޮމާންޑް މެދުވެރިކޮށް ބަލައި ފިޔަވަޅު އަޅަންޖެހޭ ފުލުހުންނަށް ފިޔަވަޅު އަޅާނެކަމުގެ ޔަޤީންކަން މި ފުރުޞަތުގައި ލޮބުވެތި ރައްޔިތުންނަށް ދެމެވެ. މިގޮތުން ފިޔަވަޅު އެޅުމުގައި ވަކިރޭންކެއްގެ ފުލުހެއް އިސްތިސްނާ ނުކުރާނެކަމުގެ ޔަޤީންކަންވެސް އަރުވަމެވެ."
ރައްޔިތުންގެ އިތުބާރާ ޔަގީންކަން ގެއްލޭފަދަ ކަންކަން ބައެއް ފުލުހުންގެ ކިބައިން ފެނިގެން ދިޔަކަމަށް ޤަބޫލު ކުރެވޭ ކަންކަން ހުރުމާއެކު ފުލުހުންގެ ޚިދުމަތުގެ އިތުބާރާ ޔަގީންކަން ދެމެހެއްޓުމަށްޓަކައި ފުލުހުންގެ މުއައްސަސާގެ ހިންގުމަށް ރައީސުލް ޖުމުހޫރިއްޔާ ދާދިފަހުން ވަނީ ބަދަލުތައް ގެންނަވާފައެވެ.
ލިޔުމުގައި ބުނަނީ ބަދަލުތަކާއެކު ފުލުހުންގެ މުއައްސަސާގެ މަސައްކަތުގެ އެންމެ އަމާޒަކީ ރައްޔިތުންގެ އިތުބާރާ ޔަޤީންކަން ލިބިގެންވާ މުއައްސަސާއެއްގެ ގޮތުގައި ދިވެހި ފުލުހުންގެ މުއައްސަސާ ދެމެހެއްޓުމަށްޓަކައި ކުރަންޖެހޭ ހުރިހާ މަސައްކަތްތަކެއް ކުރުން ކަމަށެވެ.
ރައްޔިތުންގެ އިތުބާރު ގެއްލޭފަދަ ކަންކަން ބަލައި އެކަންކަން އިސްލާހު ކުރަން އަވަސް ފިޔަވަޅުތަކެއް އަޅަން ފުލުހުންގެ އެގްޒެކެޓިވް ބޯޑާއި މެނޭޖްމަންޓު ބޯޑުން ފަށާފައިވާ ކަމަށް އިޝާރާތްކޮށް ބުނެވައި ވަނީ އެ ފިޔަވަޅުތައް ހަލުއިކޮށް ކުރިޔަށްދާ ކަމަށާއި އެ މަސައްކަތްތަކާއެކު ފުލުހުންގެ މުއައްސަސާ އާމެދު އިތުބާރާ ޔަޤީންކަން އިތުރުވެ، ރައްޔިތުންނަށް ރައްކާތެރިކަން ކަށަވަރުކަންމަތީ ދަމަހައްޓާނެ މުއައްސަސާއެއްގެ ގޮތުގައި މި މުއައްސަސާ ފެނިގެންދާނެ ކަމުގެ ޔަގީންކަން ވެސް ދޭ ކަމަށެވެ.
މޯލްޑިވްސް ޕޮލިސް ސާވިސް
އިތުބާރު ގެއްލޭ ކަންކަން ބައެއް ފުލުހުން ކުރި، އެ މީހުންގެ ރޭންކަށް ނުބަލާ ފިޔަވަޅު އަޅާނެ: ޕޮލިސް
ދިވެހި ފުލުހުންގެ ރަސްމިއްޔާތެއް: ބައެއް ފުލުހުން ވަނީ އިތުބާރު ގެއްލޭ ގޮތަށް ކަންކަން ކޮށްފައި -- ފޮޓޯ: ޕޮލިސް