ހަތަރު އަހަރު ފިލްމީ މަސައްކަތާ ދުރުގައި ހުރުމަށްފަހު ޕްރާޗީ ދެސާއީ އަނެއްކާވެސް އެ މަސައްކަތް ފަށައިފި އެވެ. ޕްރާޗީ ދެ ވަނަ ފަހަރަށް އެނބުރި އައުން ފާހަގަ ކުރާ ފިލްމަކީ މާޑާ މިސްޓްރީއެއް ކަމަށްވާ "ސައިލެންސް... ކެން ޔޫ ހިއަ އިޓް؟" އެވެ.
ޕްރާޗީ އަކީ ޓީވީ ސިލްސިލާތަކުން އެކްޓިންގެ މަސައްކަތް ފަށައި ބޮލީވުޑުން ޖާގަ ހޯދި އެކްޓަރެކެވެ. އޭނާ ފުރަތަމަ ކުޅެފައިވަނީ 2006 ގައި ދެއްކި މަޝްހޫރު ސިލްސިލާ "ގަސަމް ސޭ" އެވެ. ރާމް ކަޕޫރު ބަތަލުގެ ބައި ކުޅުނު މި ސިލްސިލާއަކީ އެކްތާ ކަޕޫރު ޕްރޮޑިއުސްކުރި ޝޯ އެކެވެ.
އެ ސިލްސިލާ ނިމުމަށްފަހު ޓީވީގެ ދުނިޔެއިން ފިލްމީ ދުނިޔެއަށް ޕްރާޗީ ގިރާކޮށްލީ ވަރަށް ކާމިޔާބު ކަމާ އެކުގަ އެވެ. އޭނާ ބޮލީވުޑަށް ތައާރަފްވީ 2008ގައި ރިލީޒްކުރި ފަރްހާން އަޚްތަރުގެ "ރޮކް އޯން" އިންނެވެ. އޭގެ ފަހުން "ވަންސް އަޕޯން އަ ޓައިމް އިން މުމްބައި"، "ބޯލް ބައްޗަން"، އަދި 2016 ގައި ރިލީޒްކުރި "އަޒްހަރް"ގައި އޭނާ ބަތަލާގެ ބައި ކުޅެފައި ވެއެވެ. އެއަށްފަހު އޭނާ ބޮޑު ސްކްރީނުން ގެއްލުނީ އެވެ.
ހަތަރު އަހަރުގެ ދިގު މުއްދަތަކަށް ފިލްމީ މަސައްކަތާ ދުރަށް ދިޔަ ސަބަބު ކިޔައިދެމުން ޕްރާޗީ ބުނީ ފިލްމު އިންޑަސްޓްރީގައި އުޅޭ މީހުންނަށް މާކެޓްކުރުމާއި އެމީހުންނާއެކު ނެޓްވާކް އަޅަން އޭނާ އެހާ މޮޅު ނޫން ކަމަށެވެ. ޕްރާޗީ ބުނާ ގޮތުގައި ހިންދީ ފިލްމު އިންޑަސްޓްރީ ބޮޑު ބައެއް ކޮންޓްރޯލްކުރަނީ މަދު ފިލްމީ އާއިލާ ތަކަކުން ކަމަށެވެ.
"ޓީވީ އާޓިސްޓުން ވީމަ އެއްވެސް މީހަކަށް ފިލްމުތަކުން އެމީހުންނަށް ފުރުސަތު ދޭކަށް ސީރިއަސް ކޮށެއް ނުވިސްނާ. އެހެންވެ އެންމެން ވެސް ބޭނުންވަނީ ވާނުވާ ބަލަން މަޑުކޮށްލައިގެން ތިބެން. ރަނގަޅު ކާމިޔާބެއް ހޯދެން ފަށައިފިނަމަ ފިލްމުތައް ހުށަހަޅަން އިހަށް ވާނުވާ ބަލާލަން ބޭނުންވަނީ. ބޮލީވުޑް ކޮންޓްރޯލްކުރާ ފިލްމީ އާއިލާތަކުން ބޭނުން ބަޔަކު އެމީހުން އުފައްދާ ފިލްމުތަކަށް ނަގާނީ. އެ އާއިލާތަކުން ބޭރު މީހުންނަކަށް އެމީހުން ފުރުސަތެއް ނުދޭނެ. އަހަންނަކީ ވަރަށް ޕްރައިވެޓް ދިރިއުޅުމެއް އުޅޭ މީހަކަށް ވެފައި ފިލްމީ މަސައްކަތް ފެށީ ޓީންއޭޖް ދުވަސްވަރު ކަމަށް ވާތީ މާކެޓް ކުރަން ވެސް ނޭނގުނީ،" ޕްރާޗީ ބުންޏެވެ.
ޕްރާޗީ ބުނި ގޮތުގައި ދުވަސްކޮޅަކަށް ބްރޭކެއް ނެގީ އަބަދު އެއް ކަހަލަ ފިލްމުތަކެއް ކުޅެން ލިބޭތީ ފޫހިވެގެންނެވެ.
ޕްރާޗީގެ "ސައިލެންސް... ކެން ޔޫ ހިއަ އިޓް؟" ރިލިޒްކުރާނީ އޯޓީޓީ ޕްލެޓްފޯމުގައި ކަމަށް ވުމީ ވެސް އޭނާއަށް މައްސަލައެއް ނޫނެވެ. މި ފިލްމު މި ހިނގާ މާޗް މަހުގެ 26 ވަނަ ދުވަހު ޒީ5 އިން ސްޓްރީމް ކުރަން ފަށާ ގޮތަށް ވަނީ ހަމަޖެހިފަ އެވެ.
ޕްރާޗީ ބުނީ އޯޓީޓީ ޕްލެޓްފޯމަކީ އެކްޓަރުންނަށް އެމީހުންގެ އެކްޓިން ހުނަރު ދައްކާލަން ލިބިފައިވާ ރަނގަޅު ފުރުސަތެކެވެ.
"ސައިލެންސް... ކެން ޔޫ ހިއަ އިޓް؟" ގައި ޕްރާޗީ ކުޅޭނީ ހިތްވަރުގަދަ ފުލުހެއްގެ ރޯލެވެ. އޭނާ އާއެކު ލީޑް ރޯލު ކުޅެނީ މަނޯޖް ބަޖްޕާއީ އެވެ. މަނޯޖް ކުޅެނީ އަވީނާޝް ނަމަކަށް ކިޔާ ވަރަށް ރުޅިގަދަ އެސިސްޓެންޓް ކޮމިޝަނާ އޮފް ޕޮލިހެއްގެ ބައެވެ.
މި ފިލްމުގައި ޕްރާޗީ އާއި މަނޯކްގެ ކެރެކްޓާ މަސައްކަތްކުރަނީ ރިޓަޔާ ވެފައިވާ ޖަޖެއްގެ އަންހެން ދަރިފުޅަކު މަރާލާފައި އޮއްވާ ފެނިގެން އޭނާ މަރުގެ ހަގީގަތް ހޯދުމަށެވެ.