ސަރުކާރުގެ މަސް ކުންފުނި މިފްކޯ އިން ހިންގާ މަސްފެކްޓްރީ ހުންނަ ފެލިވަރުން މިހާތަނަށް 75 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތް އިމާޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.
ފެލިވަރުން ކޮވިޑްގެ ކޭސްތަކެއް ފެނުމާއި ގުޅިގެން އެރަށުން ވަނީ ގިނަ ބައެއްގެ ސާމްޕަލް ނަގާފައެވެ. އެ ރަށުން ފުރަތަމަ ޕޮޒިޓިވް ކޭސްއެއް ފެނިފައިވަނީ މި މަހުގެ 24 ވަނަ ދުވަހުއެވެ.
އެޗްއީއޯސީއިން މިރޭ ބުނީ ފެލިވަރުން އެންމެ ފަހުން މީހަކު ޕޮޒިޓިވްވެފައިވަނީ އިއްޔެ ކަމަށެވެ. އިއްޔެ ވަނީ ހަތަރު މީހަކު ޕޮޒިޓިވްވެފައެވެ. ހުކުރު ދުވަހު ވަނީ 66 މީހަކު ޕޮޒިޓިވްވެފައެވެ. މިހާތަނަށް ފެލިވަރުން 75 މީހަކު ވަނީ ކޮވިޑަށް ޕޮޒިޓިވްވެފައެވެ.
މިފްކޯ އިން ހިންގާ މަސްފެކްޓްރީ ހުންނަ ފެލިވަރުން ގިނަ ބަޔަކު ޕޮޒިޓިވްވީ ނަމަވެސް މިފްކޯގެ އުފެއްދުންތައް ހުސްނުވެ ލިބޭނެ ކަމުގެ ޔަގީންކަން އެ ކުންފުނިން ވަނީ ދީފައެވެ.
މި ދުވަސްވަރު އަތޮޅުތެރޭގެ ރަށްރަށުގައި ގިނަ އަދަަދަކަށް ޕޮޒިޓިވް ކޭސްތައް ވަނީ އިތުރުވެފައެވެ.