މަދަނީ ހިދުމަތެއްގެ ގޮތުގައި ފުލުހުންގެ ހިދުމަތް ބަދަލުވުމަށްފަހު އެޅުނު އެންމެ ހަރުދަނާ ފިޔަވަޅަކީ ފުލުހުންގެ ގާނޫނީ އޮނިގަނޑަށް ދާދިފަހުން ގެނެވުނު ބަދަލުކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރައީސުލްޖުމްހޫރިއްޔާ މިހެން ވިދާޅުވީ ދިވެހި ފުލުހުންގެ ހިދުމަތަށް 88 އަހަރު ފުރުމުގެ މުނާސަބާގައި ދެއްވި ހިތާބުގައެވެ.
ރައީސުލްޖުމްހޫރިއްޔާގެ ހިތާބުގައ، މި މަހުގެ 27 ވަނަ ދުވަހުން ފެށިގެން އަމަލުކުރަމުން އަންނަ ފުލުހުންގެ އައު ގާނޫނުގެ މައްޗަށް އަލިއަޅުވާލައްވައި، އެ ގާނޫނުގެ ސަބަބުން ފުލުހުންގެ ހިދުމަތް އިތުރަށް ކުރިއަރުވައި ތަރައްގީ ކުރުމަށް މަގުފަހިވެގެންދާނެ ކަމަށް ވިދާޅުވިއެވެ. އާ ގާނޫނުގެ ބޭނުމަކީ ވެސް މިނިވަން ޒިންމާދާރު މުއައްސަސާއެއްގެ ގޮތުގައި ފުލުހުންގެ ހިދުމަތް ތަރައްގީކޮށް ފުލުހުންނަށް ބޭނުންވާ ގާނޫނީ ރައްކާތެރިކަމާއި، ގާނޫނީ ބާރާއި ގާނޫނީ ހައިސިއްޔަތު ފުލުހުންގެ މުއައްސަސާއަށާއި މުވައްޒަފުންނަށް ލިބިދިނުންކަމުގައި އެމަނިކުފާނު ވިދާޅުވިއެވެ.
އަދި އެ ބަދަލާއެކު ފުލުހުންގެ ހިދުމަތް އިތުރަށް ލާމަރުކަޒުވެ ކޮމިޔުނިޓީ ޕޮލިސިންގެ އުސޫލުން އަދި ރައްޔިތުންނާ ގާތުން ދެވޭ ހިދުމަތަކަށް ފުލުހުންގެ ހިދުމަތް ބަދަލުވެގެންދާނެ ކަމަށް ވިދާޅުވިއެވެ.
"ދިވެހި ސިފައިންނާ އެކުގައި ކުރިން އޮތް ދިވެހި ފުލުހުންގެ ހިދުމަތް، މަދަނީ ހިދުމަތެއްގެ ގޮތުގައި މުޅިން ވަކި މުއައްސަސާއަކަށް ބަދަލުވުމަށްފަހު މިވީ 17 އަހަރުގެ ތެރޭގައި ފުލުހުންގެ ކުރިއެރުމާއި ތަރައްގީއަށް މިހާތަނަށް އެޅުނު އެންމެ ހަރުދަނާ ފިޔަވަޅެއް ކަމުގައި އަޅުގަނޑު ދެކެނީ، ފުލުހުންގެ ގާނޫނީ އޮނިގަނޑަށް މިގެނެވުނު މުހިންމު ބަދަލު. މި ބަދަލުގެ އެންމެ މުހިންމު ބޭނުމަކީ މިނިވަން ޒިންމާދާރު މުއައްސަސާއެއްގެ ގޮތުގައި، ފުލުހުންގެ ހިދުމަތް ތަރައްގީކޮށް، ފުލުހުންނަށް ބޭނުންވާ ގާނޫނީ ރައްކާތެރިކަމާއި، ގާނޫނީ ބާރާއި، ގާނޫނީ ހައިސިއްޔަތު، ފުލުހުންގެ މުއައްސަސާއަށާއި މުވައްޒަފުންނަށް ލިބިދިން،" ރަައީސް ވިދާޅުވިއެވެ.