އަތޮޅުތެެރޭގެ ރަށްރަށުގައި ބަލި ފެތުރިފައިވާ މިންވަރު ދެނަގަތުމަށް ރެންޑަމް ސާމްޕަލް ނަގަން އެދުމުން ބައެއް މީހުން ސާމްޕަލް ދޭން ދެކޮޅު ހަދާ ކަމަށާ އެއީ އެރަށެއްގައި ބަލި ފެތުރި ބޮޑުވަރުވާން މެދުވެރިވެދާނެ ސަބަބެއް ކަމުން އެކަން އެގޮތަށް ނުކުރުމަށް ހެލްތް އިމާޖަންސީ އޮޕަރޭޝަން (އެޗްއީއޯސީ) އިން އިލްތިމާސް ކޮށްފި އެވެ.
މި ދުވަސްވަރަކީ އަތޮޅުތެރޭގައި ކޮވިޑް-19 ގެ ކޭސްތައް އެންމެ ގިނަ ދުވަސްވަރެވެ. 58 ރަށެއްގައި 900 ވުރެ ގިނަ ޕޮޒިޓިވް ކޭސްތައް އެބަހުއްޓެވެ.
އެޗްއީއޯސީގެ ނޫސްވެރިންގެ ބައްދަލްވުމުގައި އެޓޯލް ޕްރިޕެއާޑްނަސް އަބްދުﷲ މައުރޫފް ވިދާޅުވީ ރަށްރަށުގައި ކޮވިޑް ފެތުރިފައިވޭތޯ އަދި ފެތުރިފައިވާނަމަ އެ މިންވަރެއް ބެލުމަށް ރެންޑަމް ސާމްޕަލްގެ މުހިންމުކަން ބޮޑު ކަމަށެވެ. ކޮވިޑްގެ ބަލިމަޑުކަން ފެށުނީއްސުރެ އެކި ރަށްރަށުން ރެންޑަމް ސާމްޕަލް ނަގާ ޓެސްޓް ކުރަމުންދާ ކަަމަށާ އެކަމުގެ ބޭނުމަކީ ބަލި ފެތުރި ބޮޑުވަރު ވުމުގެ ކުރިން ފިޔަވަޅު އަޅާ ބަލި ޖެހިފައިވާ މީހުން އަވަހަށް ދެނެގަތުން ކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ ބައެއް ރަށްރަށުގައި ރެންޑަމް ސާމްޕަލް ދޭން ބައެއް މީހުން ދެކޮޅު ހަދާ ކަމަށާ މިއީ ބަލި ފެތުރި ބޮޑުވަރުވާން ދިމާވާ އެެއް ސަބަބު ކަމަށެވެ. އަދި ބަލީގެ ހާލަތު ވަރަށް ބޮޑަށް ގޯސްވެ އެތަށް ބަޔަކު ޕޮޒިޓިވްވުމުން އެ ރަށްރަށުގެ އެންމެންވެސް ސާމްޕަލް ނަގަން ބޭނުންވާ ކަމަށެވެ. ނަމަވެސް އެ ހާލަތަށް ދިއުމުގެ ކުރިން ރެންޑަމް ސާމްޕަލިންއަށް އެއްބާރުލުން ދިނުމަށް މައުރޫފް ވަނީ އެދިފައެވެ.
"ހާއްސަކޮށް ބަލި ނެތް ރަށެއްގައި ދުރާލާ ސާމްޕަލް ނަގާނަމަ އެކަމަށް އެއްބާރުލުން ދިނުން އެއީ ވަރަށް މުހިންމު ކަމެއް،" މައުރޫފް ވިދާޅުވިއެވެ.
ކޮވިޑްގެ ހާލަތު އެންމެ ގޯސް ރަށްތައް
- ޅ. ފެލިވަރު - 347 މީހުން ޕޮޒިޓިވް
- ޅ. ނައިފަރު - 179 މީހަކު ޕޮޒިޓިވް
- ކ. ހުރާ - 135 މީހަކު ޕޮޒިޓިވް
- ކ. ދިއްފުށި - 105 މީހަކު ޕޮޒިޓިވް
- ޅ. ހިންނަވަރު - 35 މީހަކު ޕޮޒިޓިވް
ކޮވިޑްގެ ހާލަތު ގޯސްވެ މިހާރުވެސް 17 ރަށެއް ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މޮނިޓަރިންގައި އެބައޮތެވެ. އަދި ބަލީގެ ހާލަތު އެންމެ ގޯސް ޅ. ނައިފަރާއި ކ. ހުރާގައި ވަނީ ޑިރެކްޓަރު ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރުގެ އެންގުމަށް ހާއްސަ ފިޔަވަޅުތަކެއް އަޅާފައެވެ.
އެގޮތުން ޒަރޫރީ ބޭނުންތަކާއި ސިއްހީ ފަރުވާ ހޯދުމަށް ދާ ދިޔުން ފިޔަވައި އެހެނިހެން ބޭނުންތަކަށް މަގުމައްޗާއި އާންމު ތަންތަނަށް ނުކުމެ އުޅުން ހުއްޓައިލުމާއި އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތާނގައި އެއްވެ އުޅުމާއި އެއް ގެއިން އަނެއް ގެއަށް ޒިޔާރަތް ކުރުން ހުއްޓައިލުމަށްވެސް ވަނީ އަންގާފައެވެ.
އަދި ޕާޓީތަކާއި ހަފްލާތަކާއި ރަސްމިއްޔާތުތައް ބޭއްވުން ހުއްޓައިލުމަށާއި ހޮޓާތަކާއި ކެފޭތަކާއި ރެސްޓޯރަންޓް ތަކުން ދެމުންގެންދާ ހިދުމަތްތައް ހުއްޓައިލުމަށްވެސް ވަނީ އަންގާފައެވެ. މީގެ ތެރޭގައި ޑެލިވަރީގެ ހިދުމަތް ދިނުމެއް ނުހިމެނެއެވެ.
މީގެ އިތުރުން ސެލޫންތަކާއި ޖިމްތާކާއި ބޯކޮށާ ތަންތަން ބަންދުކުރުމާއި ކުޅިވަރުގެ ހުރިހާ ހަރަކާތްތަކާއި ކަސްރަތުގެ ހަރަކާތްތައް ހިންގުން ހުއްޓައިލުމާއި ޔުނިވާސިޓީތަކާއި ކޮލެޖްތަކާއި ސްކޫލުތަކަށް ދަރިވަރުން ހާޒިރުވެގެން ކްލާސްތައް ކުރިޔަށް ގެންދިޔުން ހުއްޓައިލުމަށްވެސް ވަނީ އަންގާފައެވެ.