އެމްޑީޕީން ކައުންސިލްތަކުގެ އިންތިހާބު ބޮޑުތަނުން ކާމިޔާބު ކުރާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މާލޭގައި ދިރިއުޅޭ ޅ. ހިންނަވަރު މީހުން ވޯޓުލުމަށް ބަހައްޓާފައިވާ ފޮއްޓަށް ވޯޓު ލެއްވުމަށް ފަހު ޖަމާލުއްދީން ސުކޫލުގައި ދެއްވި ކުރު ޕްރެސްގައި ރައީސް ވިދާޅުވީ މަޖިލިސް އިންތިހާބުން އެމްޑީޕީއަށް ލިބުނު ކާމިޔާބީއަށްވުރެ ބޮޑު ކާމިޔާބީއެއް މިއަދު ކުރިއަށްދާ ކައުންސިލް އިންތިހާބުން ލިބޭނެ ކަމުގެ ޔަގީންކަން އެބައޮތް ކަމަށެވެ.
ރާއްޖޭގެ އަތޮޅުތައް ހިންގުމުގެ ނިޒާމަށް ބޮޑެތި ބަދަލުތަކެއް އައިސްފައިވާ ކަން ފާހަގަ ކުރައްވަމުން ރައީސް ވިދާޅުވީ މިއަދުގެ ވޯޓަށްފަހު އިންތިހާބުވާ ކައުންސިލަރުން އެ ނިޒާމުގެ ބޭނުން ރަނގަޅު ގޮތުގައި ހިފާނެ ކަމަށް އުންމީދު ކުރައްވާ ކަމަށެވެ.
ރައީސް އިތުރަށް ވިދާޅުވީ މާލެ ސިޓީ މޭޔަރުކަން ޔަގީންކަމާ އެކު އެމްޑީޕީ އަށް ކާމިޔާބުވާނެ ކަމަށާއި، މޭޔަރުގެ ގޮނޑި 60 ޕަސެންޓާއި އެކީ އެމްޑީޕީ އިން ކާމިޔާބު ކުރައްވާނެ ކަމަށެވެ.
ވޯޓުލާންދާ މީހުން މަދުކަން ފާހަގަ ކުރައްވައި ރައީސް ވިދާޅުވީ މެންދުރު ފަހު ވޯޓުލާންދާ މީހުންގެ ނިސްބަތް ރަނގަޅު ވާނެ ކަމަށާއި، މިއީ ވަރަށް މުހިންމު ވޯޓެއް ކަމުން ވީހާ ވެސް ގިނަ ބަޔަކު ވަޑައިގެން ވޯޓު ލެއްވުމަށް އެދިވަޑައިގަންނަވާ ކަމަށެވެ.