ކިތަންމެ ވަރަކަށް ފޭކު އެއްޗިހި ފެނުނަސް ލިބޭ ހުރިހާ މައުލޫމާތަކަށް އެންމެ ސީރިއަސް ލެވެލްގައި ސިފައިންނާއި ފުލުހުން އެޓެންޑުކުރާނެ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފި އެވެ.
އެމްއެންޑީއެފުން މިއަދު ބޭއްވި ނޫސްވެރިންގެ ބައްދަލުވުމެއްގައި ކޯސްޓުގާޑުގެ ކެޕްޓަން އަލީ އިހުސާން ވިދާޅުވީ ، މިވަގުތު ސަލާމަތީ ބާރުތަކުގެ އެންމެ އިސް ބޭނުމަކަށް ވާނީ އާންމު ސަލާމަތްތެރިކަން ކަށަވަރު ކުރުން ކަމަށެވެ. އެހެންކަމުން ފުލުހުންނަށް ލިބޭ މި ތްރެޓްގެ ސީރިއަސްނެސްއަކީ އެންމެ ހައި ލެވެލްގައި ސަލާމަތީ ބާރުތަކުން ޑީލް ކުރާ އެއްޗެއް ކަމަށް ކެޕްޓަން އިހުސާން ވިދާޅުވި އެވެ.
އިހުސާން ވިދާޅުވި ގޮތުގައި، މިހާލަތުގައި ގޮވާ އެއްޗަކާ ބެހޭގޮތުން ފުލުހުންނަށް ލިބޭ މައުލޫމާތު އެއްވެސް ވަރަކަށް ދަރަޖަ ނުކުރާނެ ކަމަށެވެ. އެހެންކަމުން ފޭކު ގޮވާއެއްޗެހި ތައްޔާރުކޮށްފައި ބެހެއްޓުމަކީ ވެސް އެއަށް އެ އޮންނަންޖެހޭ ލެވެލްގައި ރިއެކްޓް ކުރާނެ ކަމެއް ކަމަށެވެ. އަދި ކިތަންމެ ގިނަ ފަހަރަކު އެފަދަ މައުލޫމާތު ލިބުނަސް އެތަނެއްގެ ސަލާމަތާ ރައްކާތެރިކަން ކަށަވަރުކުރުމަށް ސިފައިން ހަރަކާތްތެރި ވާނެ ކަމަށް ވެސް އިހުސާން ވިދާޅުވި އެވެ.
އާންމު މަސްލަހަތު ނަގާލައި، މީހުންނަށް ބިރު ދައްކައި، ފޭކު އައިއީޑީތައް ހަދައިގެން ކުރާ ކަންކަން ދެން ބަލާނީ ޓެރަރިސްޓު އަމަލުތަކެއްގެ ގޮތުގައި ކަމަށް އިހުސާން ވިދާޅުވި އެވެ. އެހެންކަމުން އެފަދަ އަމަލެއް ކުރިކަން ސާބިތުވެގެން ހައްޔަރުކުރެވޭ މީހާއާ މެދު އަމަލުކުރެވޭނީ ޓެރަރިސްޓަކާ މެދު އަމަލުކުރާ ގޮތަށް ކަމަށް ވެސް އޭނާ ވިދާޅުވިއެވެ.
"އަޅުގަނޑުމެންނަށް ފެންނަ ފޭކު ޑިވައިސްތައް ބެހެއްޓުން އަޅުގަނޑުމެން ބަލަނީ ޓެރަރިޒަމްގެ އަމަލެއްގެ ގޮތުގައި. މީހުންނަށް ބިރުދެއްކުމަށްޓަކައި ނުވަތަ، އާންމު މަސްލަހަތު ނަގާލުމަށްޓަކައި، ނުވަތަ ފުލުހުންނާ ސިފައިންގެ ރިއެކްޝަން ހުންނަ ގޮތެއް ބެލުމަށްޓައި ނަމަވެސް، ކޮންމެ ފަދަ މަގުސަދެއްގައި މިކަންކަން ކުރިޔަސް އަޅުގަނޑުމެން ބަލާނީ ޓެރަރިސްޓް އަމަލުތަކެއްގެ ގޮތުގައި،" އިހުސާން ވިދާޅުވި އެވެ.
އިހުސާން ވިދާޅުވީ، ގޮވާއެއްޗެއް ކަމަށް ބެލެވޭ އެއްޗެއް ފެނުމުން އެ އެއްޗެއް އެހެން ތަނަކަށް ގެންދަނީ ސަލާމަތްތެރިކަމުގެ ގޮތުން އެކަންކަން ކުރަން ކަނޑައަޅާފައި އޮންނަ ޕްރޮސީޖާގެ ތެރެއިން ކަމަށެވެ.
" އަޅުގަނޑުމެން މި ޑީލް ކުރަނީ ހަމަ އަޅުގަނޑުމެންގެ އެސްޓަބްލިޝް ޕްރޮސީޖާގެ ތެރެއިން. އެންމެ ފުރަތަމަ އަޅުގަނޑުމެން އެ އެއްޗަކީ ރިމޯޓް ކޮންޓްރޯލް ނުކުރެވޭ އެއްޗެއްކަން އަޅުގަނޑުމެން މި ކަށަވަރު ކުރަނީ. އެކަން ބަލަން ސިގްނަލް ޖޭމް އެއް ބޭނުންކުރަން. ފާހަގަކުރެވޭނެ، ފޯނުތަކާއެއްޗިހި ބޭނުން ނުކުރެވޭ ކަމާ މިކަހަލަ އެއްޗިހި. އެހެން ހެދުމަށްފަހު އަޅުގަނޑުމެން ޔަގީންކުރަން އެ އެއްޗަކީ ޓައިމިން ޑިވައިސްއެއް ނެތް އެއްޗެއް ކަމަށް. އަޅުގަނޑުމެން އެކަން ކުރާ ޕްރޮސީޖާއެއް އޮވޭ. ދެ އަޅުގަނޑުމެން އެ އެއްޗެއް މި ލަނީ ބޮމްބް ކޮންޓެއިނާ ކިޔާ އެއްޗަކަށް. އެކި ގައުމުތަކުގައި އެކި ލެވެލްގަ އެ ބޭނުން ކުރާނެ. އެއީ ގޮވާ އެއްޗެއް އެއްތަނުން އަނެއް ތަނަށް މޮބިލައިޒް ކުރުމަށް ރަސްމީގޮތުން ގެންގުޅޭ އެއްޗެއް. އެއަށް ލައިގެން އަޅުގަނޑުމެން އެ އެއްޗެއް މި މޫވް ކުރަނީ. އަޅުގަނޑުމެން މޫވް މި ކުރަނީ އެއަށް ޝޮކް ނުލިބޭ ސްޕީޑެއްގަ،" ކެޕްޓަން އިހުސާން ވިދާޅުވި އެވެ.