މާލޭގެ މޭޔަރު ކަމަށް އަމިއްލަ ގޮތުން ކުރިމަތިލެއްވި ކެންޑިޑޭޓް އަލްހާން ފަހުމީއަށް ލިބިވަޑައިގެންނެވީ ވޯޓްލީ މީހުންގެ އެއް ޕަސެންޓް ވޯޓެވެ. އެހެންވެ އޭނާއަށް އަމާޒުވަމުންދާ ފާޑުކިޔުންތަކަށް އޭނާ ރައްދު ދެއްވައިފި އެވެ.
ކައުންސިލް އިންތިހާބުގެ މުޅި ފޯކަސް ހުއްޓުނު މާލޭގެ މޭޔަރުގެ މަގާމަށް ތިން ބޭފުޅަކު ވާދަ ކުރެއްވި އެވެ. އެއީ އަލްހާންގެ އިތުރުން ޑރ. މުހައްމަދު މުއިއްޒު އާއި އަނަސް އަބްދުއްސައްތާރެވެ. މި އިންތިހާބު ޕީޕީއެމްގެ ކެންޑިޑޭޓް މުއިއްޒު ކާމިޔާބު ކުރެއްވީ 12،400 ވުރެ ގިނަ ވޯޓް ހޯއްދަވައިގެނެވެ. އަނަސް ވެސް ވަނީ 7،500 އާ ގާތްކުރާ އަދަދަކަށް ވޯޓް ހޯއްދަވާފަ އެވެ. ވަގުތީ ނަތީޖާތައް ފެންނަ ގޮތުން މި އިންތިހާބުގައި އަލްހާނަށް ލިބިވަޑައިގެންނެވީ 275 ވޯޓެވެ. މިއީ މާލޭގައި މޭޔަރު ހޮވަން ވޯޓުލީ މީހުންގެ އެއް ޕަސެންޓެވެ.
ނަތީޖާއާއެކު ބައެއް ފަރާތްތަކުން ވަނީ އަލްހާނަށް ފާޑުކިޔާފަ އެވެ. އަދި މި އިންތިހާބުގައި ބާތިލު ވޯޓަށްވުރެ ވެސް އަލްހާނަށް ލިބިވަޑައިގެން ވޯޓްގެ އަދަދު މަދު ކަމަށް ބުނެ ބައެއް ރިޕޯޓްތައް ލިޔެފައި ވެއެވެ.
އެކަމަށް އިޝާރާތް ކުރައްވާ އަލްހާން ވަނީ އެއް ޕަސެންޓް ވޯޓް ލިބުމަކީ މައްސަލައެއްތޯ ސުވާލު ކުރައްވާފަ އެވެ. އަދި އެ ވާހަކަ ދައްކާއިރު އެއް ޕަސެންޓް ވޯޓަކީ ވަރަށް ބޮޑު ކާމިޔާބެއް ކަމަށް ވެސް ވިދާޅުވި އެވެ. އަދި ވިދާޅުވީ ބޮޑު ދެ ޕާޓީީއާ ވާދަ ކޮށްގެން އެއް ޕަސެންޓްގެ ވޯޓު ހޯދުމުން ކުދި ސިޔާސީ ޕާޓީތަކަށް ތާއީދު ނެތް ކަން ދައްކައިދޭ ކަމަށެވެ.
ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު ކަން ކުރިން ކުރައްވާފައިވާ އަލްހާން ފަހުމީގެ ސިޔާސީ ހަރަކާތްތައް ފަށާފައި ވަނީ ޑީއާރްޕީންނެވެ. އޭގެ ފަހުން އޭނާ ވަނީ އެމްޑީޕީ އާއި ޖުމްހޫރީ ޕާޓީގައި ވެސް މަސައްކަތް ކުރައްވާފަ އެވެ. އަލްހާން ވަނީ ކުރިއަށް އޮތް ރިޔާސީ އިންތިހާބުގައި ވާދަ ކުރައްވާނެ ކަމަށް ވެސް އިއުލާނު ކުރައްވާފަ އެވެ.
މާލޭގެ މޭޔަރަކު ހޮވުމަށް ބޭއްވި އިންތިހާބުގައި ވޯޓުލުމުގެ ހައްގު ލިބިފައިވާ 51،702 މީހުންގެ ތެރެއިން ވޯޓު ލާފައިވަނީ 21،091 މީހުންނެވެ. މީގެތެރެއިން 970 ވޯޓު ބާތިލުވީއިރު ސައްހަ ވޯޓުގެ އަދަދަކީ 20،116 ވޯޓެެވެ.
