ބެލަރޫސްގައި ސަރުކާރު ވައްޓާލައި ރައީސް އެލެގްޒެންޑާ ލުކަޝެންކޯ އަވަހާރަ ކޮށްލަން އިދިކޮޅުން ސިއްރިއްޔާތުގައި ކުރި މަސައްކަތްތަކަށް އެމެރިކާއިން ވާގިވެރިވި ކަމަށް ބުނެ ދައްކަނީ ހަގީގަތެއް ނެތް ވާހަކަތަކެއް ކަމަށް އެމެރިކާގެ ސްޓޭޓް ޑިޕާޓްމަންޓުން ބުނެފި އެވެ.
"ރައީސް ލުކަޝެންކޯ އަވަހާރަ ކޮށްލަން މަސައްކަތްކުރި ބަޔަކު މަސައްކަތްކުރީ އެމެރިކާ ސަރުކާރުން ހިތްވަރުދީގެން ކަމަށް ބުނެ ދައްކާ ވާހަކަތަކަކީ ރޯމަރުދޮގު،" ސްޓޭޓް ޑިޕާޓްމަންޓްގެ ތަރުޖަމާން ވިދާޅުވި އެވެ.
ސްޓޭޓް ޑިޕާޓްމަންޓުން ބުނީ އެމެރިކާއާ ބެލަރުސްގެ ޕާސްޕޯޓް ގެންގުޅޭ މީހަކު ބެލަރުސްގެ ވެރިރަށް މިންސްކްގައި ހައްޔަރު ކުރިކަން އޮތީ އެނގިފައި ކަމަށެވެ. އަދި ބުނީ އެކަމާ ގުޅިގެން ފޯރުކޮ ށްދޭން ޖެހޭ ޑިޕްލޮމެޓިކު އެހީތެރިކަން ފޯރުކޮށް ދޭނެ ކަމަށެވެ.
ރަޝިއާގެ އިންޓާނަލް ސެކިޔުރިޓީ އޭޖެންސީން ބުނީ ހަތިޔާރާއެކު ބެލަރުސްގައި ބަޣާވާތްކޮށް ރައީސް އެލެގްޒެންޑާ ލުކަޝެންކޯ އަވަހާރަ ކޮށްލަން ރާވަމުން ދަނިކޮށް ދެމީހަކު ހައްޔަރުކުރި ކަމަށެވެ.
ލުކަޝެންކޯ ވެސް ވަނީ މިމޭރުމުން މައުލޫމާތު ދެއްވައި ގައުމީ ދިފާއީ ބާރުތަކުން ހަތިޔާރާއެކު ގުރޫޕެއް ހިފަހައްޓައި ސުވާލު ކުރަމުން އަންނަ ކަމަށް ވިދާޅުވެފަ އެވެ. އެމީހުން ބުނި ކަމަށް ރައީސް ވިދާޅުވީ އެމީހުންނަށް އޮތް އޯޑަރަކީ ސަރުކާރު ވައްޓާލައި ރައީސް އާއި އާއިލާ އަވަހާރަ ކޮށްލުން ކަމަށެވެ. އަދި އެމީހުންނަށް އޯޑަރު ދެނީ އެމެރިކާގެ އިންޓެލިޖެންސް ސާވިސްއިން ކަމަށެވެ.
ރަޝިއާގެ ރައީސް ޕޫޓިން މީޑިއާއަށް ވިދާޅުވި ގޮތުން އެމެރިކާގެ ރައީސް ބައިޑަންއާއެކު ފޯނުން ކުރެއްވި މަޝްވަރާގައި ބެލަރުސްގައި ކަމެއް ހިނގަން އުޅޭ ވާހަކަ ދެންނެވި ކަމަށެވެ. އެހެން ނަމަވެސް، އެކަމާ ގުޅުންހުރި އެއްވެސް އެއްޗެއް ބައިޑަން ވިދާޅު ނުވާ ކަމަށެވެ.