އަންނަ ހޮނިހިރު ދުވަހު ބާއްވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ދެވަނަ ބުރުގައި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލާން ރީރަޖިސްޓަރީވުމުގެ ފުރުސަތު ހުޅުވާލައިފި އެވެ.
އިންތިހާބުގެ ދެވަނަ ބުރަށް ރީ ރަޖިސްޓްރީވާން ޖެހޭނީ ހއ. ތަކަންދޫ އާއި ހއ. އުލިގަމާއި ނ. މަގޫދޫ އާއި ރ. މާކުރަތާއި ބ. ކެންދޫ އާއި ބ. ކިހާދޫ އާއި ވ. ފުލިދޫ އާއި މ. ރަތްމަންދޫ އާއި ފ. ދަރަނބޫދޫގެ އިތުރުން ލ. ކަލައިދޫ ރައްޔިތުން އެކަންޏެވެ.
ރީ ރަޖިސްޓްރީއަށް ފުރުސަތު އޮތީ މިއަދު ހެނދުނު 9:00 އިން މެންދުރު ފަހު 1:00 އަށެވެ.
އިލެކްޝަންސް ކޮމިޝަނުން ބުނީ މި މުއްދަތުގެ ތެރޭގައި ރަޖިސްޓަރީވުމަށް އެދި ހުށަހަޅާނީ މި ރަށްރަށުގެ ތެރެއިން ރަށަކަށް ނުވަތަ މާލެ އަށް ރަޖިސްޓަރީވެފައިވާ މީހުންގެ ތެރެއިން ރަޖިސްޓަރީވެފައިވާ ތަން ނޫން އެހެން ރަށަކަށް ރަޖިސްޓަރީވާން އެދޭ މީހުން ކަމަށެވެ. އެހެންކަމުން މިހާރު ރަޖިސްޓަރީވެފައިވާ ރަށް ނޫން ރަށަކަށް ވޯޓުލާން ބޭނުންނަމަ މި މުއްދަތުގެ ތެރޭގައި އެމީހަކު ވޯޓުލުމަށް ރަޖިސްޓަރީ ކުރަން ޖެހޭނެ އެވެ. ވިލިމާލެ އާއި ހުޅުމާލެގައި ރަޖިސްޓަރީވެފައިވާ މީހުން ވަނީ މާލެއަށް ބަދަލު ކޮށްފައެވެ. އަދި މާލެ ފިޔަވާ އެހެން ތަނެއްގައި ރަޖިސްޓަރީކޮށްފައިވާ ނަމަ، މީހެއް ވާނީ ދާއިމީ އެޑްރެހަށް ބަދަލު ކޮށްފައެވެ.
މިހާރު ވޯޓުލުމަށް ރަޖިސްޓަރީވެފައިވާ ތަނުގެ މައުލޫމާތު ކޮމިޝަނުގެ ވެބްސައިޓުން ޗެކް ކުރެވޭނެއެވެ.
ރީ ރަޖިސްޓްރީވާން އެދޭ މީހުން ފޯމް ހުށައަޅާނީ މާލޭގައި ނަމަ އިންތިހާބާބެހޭ މައިމަރުކަޒު ބާ ޖަމާލުއްދީން އަށެވެ. އަދި ރަށްރަށުގައި ނަމަ ކައުންސިލް އިދާރާ އަށެވެ.