ހަތްދިހަ ހާހަށްވުރެ ގިނަ ފައިސާއާ ގިނަ އަދަދެއްގެ މަސްތުވާތަކެއްޗާ އެކު ހދ ކުޅުދުއްފުށީ ޒުވާނަކު ހައްޔަރުކޮށްފި އެވެ.
ފައިސާއާ މަސްތުވާތަކެއްޗާއެކު ފުލުހުން ހައްޔަރުކޮށްފައިވަނީ 27 އަހަރުގެ ފިރިހެނެކެވެ.
ފުލުހުން ބުނީ އޭނާ ހައްޔަރުކޮށްފައިވަނީ ކުޅުދުއްފުށި ޕޮލިސް ސްޓޭޝަނާއި ޕޮލިސް އިންޓެލިޖެންސާއި ގުޅިގެން ހިންގި އޮޕަރޭޝަނުގައި މި ނޮވެންބަރު މަހުގެ 06 ވަނަ ދުވަހުގެރޭ 20:45 ހާއިރު ހދ.ކުޅުދުއްފުށި އިރު އުތުރުފަރާތު ގޮނޑުދޮށުން ކަމަށެވެ.
ފުލުހުން ބުނީ، އޭނާ ބަލައިފާސްކުރަން ފުލުހުން އުޅުނު ވަގުތު އޭނާ އެއްލި އެއްޗެއްގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 5 ސެލޯފިންކޮޅު ފެނިފައިވާ ކަމަށާއި އޭގެ އިތުރުން އޭނާގެ ވޮލެޓުން 17000ރ ވެސް ފެނިފައިވާ ކަމަށެވެ.
މީގެއިތުރުން އޭނާ ދިރިއުޅެމުންދާ ގޭގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 143 ސެލޯފިންކޮޅު ފެނިފައިވާއިރު، 70600 ރުފިޔާއަށްވުރެ ގިނަ ފައިސާ ވެސް ވަނީ ފެނިފައެވެ.
މި މައްސަލާގައި ހައްޔަރުކުރި މީހާގެ ބަންދާއި މެދު ގޮތެއް ނިންމުމަށް ހދ.ކުޅުދުއްފުށި މެޖިސްޓްރޭޓް ކޯޓަށް ހާޒިރުކުރުމުން ވަނީ މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުގީގު ކުރަން 07 ދުވަހުގެ މުއްދަތެއް ދީފައެވެ.
ފުލުހުން ބުނީ މައްސަލަ މިހާރު ތަހުގީގުކުރަމުންދާ ކަމަށެވެ.
