ކްރިސްޓަލް ޑިސޫޒާ އަކީ އިންޑިޔާގެ ޓީވީ ސިލްސިލާތައް ބަލާ މީހުންގެ މެދުގައި މަގްބޫލު ބަތަލާ އެކެވެ. "އޭކް ހަޒާރޯންމޭ މޭރީ ބެހެނާ ހޭ"ގައި ލީޑް ރޯލު ކުޅުނު އެއް ބަތަލާ އަކީ ކްރިސްޓަލް އަށް ވެފައި އެ ރޯލުން އޭނާއަށް ގިނަ ބައެއްގެ ލޯބި ލިބިފައި ވެއެވެ. އޭގެ ފަހުން ވެސް ބައެއް ޓީވީ ޝޯ ތަކުގައި ކްރިސްޓަލް ބައިވެރިވި އެވެ.
މިހާރު ބޮލީވުޑު ފިލްމުތަކުން ޖާގަ ހޯދަން ކްރިސްޓަލް މަސައްކަތް ކުރަމުންދާއިރު އޭނާ ދިން ގިނަ އޮޑިޝަންތަކުން ފޭލްކޮށްލާފައިވަނީ ޓީވީގައި މަސައްކަތް ކޮށްފައިވާތީ ކަމަށް ކްރިސްޓަލް ބުންޏެވެ.
އޭނާ ބުނި ގޮތުގައި އެއް ފިލްމަކަށް އޭނާ މުޅިން ފައިނަލްކޮށްފައި އެންމެ ފަހު ވަގުތު ވެސް އޭނާ ކަޓުވާލާފައި އެހެން އެކްޓަރަކު އެ ރޯލަށް ނެގި އެވެ.
"އެ ފަހަރު އަހަރެން މުޅިން އެ ފިލްމަށް ފައިނަލް ވީފަހުން އެމީހުންނަށް އެނގުނީ އަހަރެން ޓީވީގައި މަސައްކަތް ކޮށްފައިވާކަން. އެހެންވެ ބުނެފި ޓީވީން ފެނިފެނި އެންމެންނަށް ވަރަށް އެނގޭ ބަތަލާއަކަށޭ އަހަރެން ވާނީ. އެހެންވީމާ އެއްގޮތަކަށް ވެސް މީހުންނަށް ފެނިފައި ނެތް ބަތަލާއަކަށް ރޯލު ދެމާ ހިނގާށޭ. ކިޔާފަ އަހަރެން ކަޓުވާލީ،" ކްރިސްޓަލް ބުންޏެވެ.
ކްރިސްޓަލް ބުނި ގޮތުގައި އޮޑިޝަނަކުން ނުހޮވުނު ޚަބަރު ލިބޭ ކޮންމެ ފަހަރަކު އޭނާއަށް ވަރަށް ރޮވެ އެވެ. އަދި ފިލްމެއް ލިބި ފަހު ވަގުތު ކަޓުވާލީމަ ވަރަށް ބޮޑަށް ދެރަވި އެވެ.
"ޗެހެރޭ"އިން ބޮލީވުޑަށް ތައާރަފްވާން ކްރިސްޓަލް މިހާރު ދަނީ ތައްޔާރުވަމުންނެވެ. އަމީތާބު ބައްޗަން އާއި އިމްރާން ހާޝިމީ ބަތަލުގެ ބައި ކުޅޭ މިފިލްމުގައި ކްރިސްޓަލް ކުޅެނީ ބަތަލާގެ ބައެވެ.
"ޗެހެރާ" އަޅުވަން އޮތީ މިދިޔަ މަހު ނަމަވެސް ކޮރޯނާވައިރަހުގެ ޕެންޑެމިކް އާ ހެދި ފިލްމު ރިލީޒްކުރުން މިހާރު ވަނީ ފަސްކޮށްފަ އެވެ.