އިތިއޯޕިއާ އިން ރާއްޖެ އައި މީހެއްގެ އަތުން 3.413 ކިލޯގެ މަސްތުވާތަކެތި އަތުލައިގެންފި އެވެ.
މޯލްޑިވްސް ކަސްޓަމްސް ސާވިސް އިން މިއަދު ބުނީ މިދިޔަ މަހުގެ 25 ވަނަ ދުވަހު ރާއްޖެ އައި އުމުރުން 30 އަހަރުގެ އިނގިރޭސިވިލާތުގެ ފިރިހެނެއް އޭނާ ރާއްޖެ އައިސްފައިވާ ރޫޓް އަދި އޭނާގެ އަމަލުތައް ހުރި ގޮތުން އޭނާ އާއި މެދު ޝައްކު ކުރެވިގެން މިމިހާގެ ލަގެޖް ކަސްޓަމްސް އިން ބަލައި ފާސްކުރިއިރު މަސްތުވާތަކެތި ފެނިފައިވާ ކަމަށެވެ. ފުރަތަމަ މަރުހަލާގައި ކަސްޓަމްސް އިން މި ތަކެތި ޓެސްޓްކުރި އިރު މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ޕޮޒިޓިވްވެފައިވާ ކަމަށެވެ.
ކަސްޓަމުން ބުނީ މި ތަކެތީގެ މަގުމަތީ އަގު 10،239،000 ރުފިޔާއަށް އަރާ ކަމަށެވެ. މި މައްސަލާގައި ހިމެނޭ މީހާ އާއި މަސްތުވާތަކެތި މިހާރު ވަނީ ފުލުހުންނާ ހަވާލުކޮށްފައި ކަަމަށްވެސް ބުންޏެވެ.