ޅ. ތިލަމާފުށީގައި އެމެރިކާގެ މެރިއެޓް އިންޓަނޭޝަނަލް ކުންފުނިން ހެދި ރިސޯޓު އަންނަ އޯގަސްޓް މަހުގައި ހުޅުވާނެ ކަމަށް ބުނެފި އެވެ.
ލަ މެރީޑިއެން މޯލްޑިވްސް ރިސޯޓު އެންޑް ސްޕާގެ ނަމުގައި ބްރޭންޑް ކޮށްގެން ތަރައްގީ ކުރި މި ރިސޯޓުގައި އެކި ފަންތީގެ 154 ވިލާ ހުރެ އެވެ. މި ވިލާތަކުގައި އެއްކޮޓަރި އާއި ދެ ކޮޓަރީގެ ވިލާތަކުގެ އިތުރުން މޫދުގައި ތަރައްގީ ކޮށްފައިވާ ވޯޓާ ވިލާތަކާއި ބީޗް ވިލާތައް ވެސް ހިމެނެ އެވެ.
ވީއައިއޭއިން ފުރައިގެން 35 މިނެޓުން ދެވޭ ރާސްތާގައި ތަރައްގީ ކޮށްފައިވާ މި ރިސޯޓަކީ އާއިލީ ރިސޯޓެކެވެ. ގާތްގަނޑަކަށް ނުވަ ހެކްޓަރުގެ މި ރަށުގައި "ތިލަމާފުށި ވިލާ" ގެ ނަމުގައިވެސް ހާއްސަ ވިލާއެއް ހަދާފައިވެ އެވެ. އަދި މި ރިސޯޓުގައި އެކި ކެއުންތައް ހިމެނޭ ގޮތަށް ހަ ރެސްޓޯރެންޓެއް ހަދާފައިވެ އެވެ.
ޅ. އަތޮޅުގައި މިހާރުވެސް ނުވަ ރިސޯޓެއް ހިންގަ އެވެ. މި ސަރުކާރުން ބުނެފައިވާ ގޮތުގައި މި އަހަރު ރާއްޖޭގައި މުޅިން އަލަށް 18 ރިސޯޓެއް ހުޅުވާނެ އެވެ.