މައިކްރޮސޮފްޓް ވިންޑޯސްއަކީ އެންމެ ގިނަ ބަޔަކު ބޭނުންކުރާ ކޮމްޕިއުޓާ އޮޕަރޭޓިން ސިސޓަމެވެ. މައިކްރޮސޮފުޓުން 2015 ގައި "ވިންޑޯސް 10" ނެރުނު ފަހުން މި އޮޕަރޭޓިން ސިސްޓަމްގެ ޕާފޯމެންސާއި ސެކިއުރިޓީއަށް ގެންނަ އަޕްޑޭޓްތައް ފިޔަވާ މާބޮޑު ބަދަލެއް އޮޕަރޭޓިން ސިސްޓަމަކަށް ނާދެ އެވެ.
މައިކްރޯސޮފްޓުން ބުނާ ގޮތުގައި ވަރަށް އަވަހަށް ވިންޑޯސް އަށް ވަރަށް ބޮޑެތި ބަދަލުތަކެއް ގެންނާނެ އެވެ. މި ބަދަލުތަކުގެ ތެރޭގައި މައިކްރޮސޮފްޓް ސްޓޯރާއި ޔޫޒާ އިންޓަފޭސްއަށް ގެންނަ ބަދަލުތަކެއް ހިމެނެ އެވެ.
މި ބަދަލުތަކާއެކީ ވިންޑޯސް ފެންނަ ގޮތަށް ކޮންމެވެސް ވަރެއްގެ ބަދަލުތަކެއް އަންނާނެ އެވެ. މީގެ ތެރޭގައި ފައިލް އެކްސްޕްލޯރާ އާއި އައިކަންތަކަށް ވެސް ބަދަލުތަކެއް އަންނާނެ އެވެ. ވިންޑޯސްގެ ފައިލް އެކްސްޕްލޯރާ އަށް ގެންނަ ބަދަލުތަކުން، ފައިލް އެކްސްޕްލޯރާ ފެންނަ ގޮތާއި ޕާފޯމަންސަށް ވެސް ރަނގަޅު ބަދަލުތަކެއް އަންނާނެ ކަމަށް ބެލެވެ އެވެ.
ވިންޑޯސްއަށް ގެންނާނެ ކަމަށް ބުނެވޭ އެންމެ ބޮޑު ބަދަލުގެ ގޮތުގައި ފާހަގަ ކުރެވެނީ ސްޓޯރަށް ގެންނަ ބަދަލުތަކެވެ. މި ބަދަލު ތަކާއި އެކީ ވިންޑޯސް ސްޓޯރުން ކުރިން ލިބެން ނުހުންނަ ވަރަށް ގިނަ އެޕްލިކޭޝަން ތަކެއް ސްޓޯރުން ލިބޭނެ އެވެ. މީގެ ސަބަބަކަށް ވަނީ ގެންނަ ބަދަލު ތަކާއި އެކީ ސޮފްޓްވެއާ ޑިވެލޮޕާސްއަށް ސްޓޯރަށް އެޕްލިކޭޝަންތައް ލުމުގެ ފުރުސަތު ހުޅުވާލުމެވެ. މީގެތެރޭގައި ގިނަ ޕްރޮގްރާމްތަކާއި ގޭމްތައް ހިމެނޭނެ އެވެ.