ހަޔާ އެޑިޔުކޭޝަން މިނިސްޓްރީން މިދިޔަ ފެބްރުއަރީ މަހު ހުޅުވާލި ސްޓޫޑަންޓް ލޯން ސްކީމަށް ކުރިމަތިލި ދަރިވަރުންގެ ތެރެއިން ލޯން ލިބޭ ދަރިވަރުންގެ ލިސްޓު އާންމުކުރުން ފަސްކޮށްފި އެވެ.
މިނިސްޓްރީން މިއަދު ބުނީ ލޯނު ލިބޭ ދަރިވަރުންގެ ލިސްޓު އާންމުކުރުން ފަސްކޮށްފައިވަނީ ކޮވިޑް-19 އާއި ގުޅިގެން ކަމަށެވެ.
މި ދަނޑިވަޅުގައި މުވައްޒަފުން ގޭގައި ތިބެގެން މަސައްކަތްކުރުމަށް ސަރުކާރުން ހަމަޖައްސަވާފައިވާތީ އާއި މި މަސައްކަތް ކުރާ ބައެއް މުވައްޒަފުންނަށް ވެސް ބަލި ޖެހުމުގެ ސަބަބުން ދަރިވަރުންނަށް ޖަވާބު ދިނުމަށް އިތުރު ވަގުތު ބޭނުންވާ ކަމަށް މިނިސްޓްރީން ބުނެ އެވެ.
ކުރިން އެ ލިސްޓް އާންމުކުރަން ނިންމާފައިވަނީ މިމަހުގެ 10 ވަނަ ދުވަހު އެވެ. ނަމަވެސް ލޯން ސްކީމްގެ ދާއިމީ ނަތީޖާ އިއުލާނު ކުރާނީ މިމަހުގެ 20 ވަނަ ދުވަހު ކަމަށް މިނިސްޓްރީން ބުނެ އެވެ.
ލޯން ސްކީމްގެ ދަށުން 770 ފުރުސަތު ހުޅުވާލި އެވެ. މިއީ މިހާތަނަށް އެންމެ ގިނައިން ލޯންގެ ފުރުސަތު ހުޅުވާލި ފަަހަރުވެސް މެއެވެ. މިދިޔަ އަހަރު ހުޅުވާލީ 550 ފުރުސަތެވެ.
ހަޔާ އެޑިޔުކޭޝަން މިނިސްޓަރު ޑރ. އިބްރާހިމް ހަސަން މީގެ ކުރިން ވިދާޅުވެފައިވަނީ މިފަހަރު ލޯން ދިނުމުގައި ކޮންމެހެން ދަރިވަރުގެ "މެރިޓް" އަށް ނުބަލާނެ ކަމަށެވެ. އޭނާ ވިދާޅުވީ މިފަހަރުގެ ލޯން ސްކީމްގައި މިހާރު ކިޔަވަމުންދާ ދަރިވަރުންނަށް 471 ފުރުސަތާއެކު އަލަށް ކިޔަވާ ދަރިވަރުންނަށް 299 ފުުރުސަތު ހިމަނާފައިވާނެ ކަމަށެވެ.
މިހާރު ކިޔަވަމުންދާ ދަރިވަރުންނަށް ލޯން ދިނުމުގައި އިސްކަންދޭން ނިންމާފައި ވަނީ ކޯސް ފުރިހަމަކުރަން ބާކީ އޮތް މުއްދަތު އެންމެ ކުޑަ ފަރާތްތަކަށެވެ.
މިފަހަރުގެ ލޯން ސްކީމްގައި ނުކުޅުދުންތެރިކަން ހުންނަ މީހުންނަށާއި ރާއްޖެއަށް ބޭނުންވާ ދާއިރާތަކަށް އިސްކަން ދީފައިވެ އެވެ. އޭގެ ތެރޭގައި ޓޫރިޒަމް، ކޮންސްޓަރަކްޝަން އަދި އައިސީޓީގެ ދާއިރާ ހިމެނެ އެވެ.