ސަލާމަތީ ފިޔަވަޅުތައް ވަރުގަދަކުރަން ގޮވާލައިފި

ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް އަޅަން ޖެހޭ ފިޔަވަޅުތައް ވަރުގަދަ ކުރުމަށް އިދިކޮޅު ކޯލިޝަނުން ގޮވާލައިފި އެވެ.

ޕީޕީއެމް އާއި ޕީއެންސީ ހިމެނޭ ކޯލިޝަނުން މިކަމަށް ގޮވާލާފައި މިވަނީ އުމުރުން 13 އަހަރުގެ މުހައްމަދު ރާއިފް އަންވަރު މަރާލުމަށްފަހު ހުޅުމާލޭގެ ދެވަނަ ފިޔަވަހީގެ އިރުއުތުރު ފަރާތު މޫދަށް އެއްލާލާފައި ވަނިކޮށެވެ.

އިދިކޮޅު ކޯލިޝަންގެ ބަޔާނުގައި ވަނީ ރާއިފް މަރާލުމުގައި ބައިވެރިވި މީހުން ހޯދާ އެ ފަރާތްތަކަށް ހައްގު އަދަބު ދިނުމަށާއި، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް އަޅަންޖެހޭ ފިޔަވަޅުތައް ވަރުގަދަ ކުރުމަށް ވެސް ގޮވާލާފަ އެވެ.

"2021 ޖޫން 22 ވީ އަންގާރަ ދުވަހުގެ އިރު އަރައިގެން އައީ މުޅި ޤައުމު ބިރުވެރިކަމުން ފުރިގެން ދާ ވަރުގެ ޚަބަރަކާއެކުއެވެ. 13 އަހަރުގެ ކުޑަ ކުޑަ ކުއްޖަކު ރަހީނު ކުރުމަށް ފަހު ވަރަށް އަނިޔާވެރި ގޮތަކަށް މަރާލުމަށްފަހު މޫދަށް އެލައްލާފައި އޮއްވާ ފެނުނު ޚަބަރަކާއެކުއެވެ. 13 އަހަރުގެ ކުޑަކުއްޖާގެ ފުރާނައަށް ރަހުމަތް ލައްވާ ސުވަރުގޭގެ މަތިވެރި ނިޢުމަތް މިންވަރު ކުރައްވައި އެ ކުޑަ ކުއްޖާގެ ޢާއިލާއަށް ކެތްތެރިކަން މިންވަރު ކުރައްވާށި. އާމީން.،" ބަޔާނުގައިވެ އެވެ.

މި ބަޔާނުގައި ވަނީ މިވަގުތު ރާއިފްގެ އާއިލާއަށް ނަފްސާނީ ގޮތުން ކުރިމަތިވަމުން އަންނާނެ އުނދަގޫ ތަކަށް ފަރުވާ ދިނުން އަވަސް ކުރުމަށްވެސް ދައުލަތުގެ ކަމާ ބެހޭ މުއައްސަސާތަކަށް ގޮވާލާފަ އެވެ.

މިއަނިޔާވެރި އަދި ލާއިންސާނީ އަމަލު ހިންގި މީހުން މި އަމަލު ހިންގާފައިވާ ސަބަބާއި، އެ ކުއްޖާ ގެއްލިގެން ރިޕޯޓް ކުރުމާއެކު ދައުލަތުގެ ކަމާ ބެހޭ މުއައްސަސާތަކުން އެ ކުއްޖާ ހޯދުމަށް ކުރެވުނު މަސައްކަތްތަކުގެ ތަފްސީލު ރައްޔިތުންނަށް ހާމަކޮށްދިނުމަކީ މުހިއްމު ކަމެއް ކަމުގައިވެސް އިދކޮޅު ކޯލިޝަނުން ގަބޫލުކުރެ އެވެ.

ބަޔާނުގައި ބުނެފައިވަނީ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަކީ ދައުލަތުގެ މައްޗަށް ލާޒިމް ޒިންމާއެއް ކަމަށެވެ. އެހެންވެ ގައުމުގައި ހިނގާ ބިރުވެރި ލާއިންސާނީ އަމަލުތައް ހިންގުމަށް މެދުވެރިވަމުން ދަނީ ދައުލަތުގެ އެންމެ އިސް ވެރިޔާ އާއި ހިސާބުން ފެށިގެން ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް އުފައްދާފައިވާ ދައުލަތުގެ މުއައްސަސާތަކުން ޒިންމާތަކުން އިހްމާލުވަމުން ދާތީ ކަމަށްވެސް ފާހަގަކޮށްފައިވެ އެވެ. ފަރުވާ ކުޑަ ކުރެވޭ މައްސަލަ އަވަހަށް ހައްލުކުރަން ޖެހޭ ކަމަށްވެސް ބުނެފައިވެ އެވެ.

"ރައީސުލްޖުމްހޫރިއްޔާއާއި، ދައުލަތުގެ ކަމާ ބެހޭ މުއައްސަސާތަކުން ޒިންމާ އިން ރެކުމަށް އިތުރު ބަހަނާތައް ދެއްކުމެއް ނެތި، މިފަދަ ކަންކަމަށް ދެވޭ ސަމާލުކަން އިތުރުކޮށް، މި އަނިޔާވެރި އަމަލު ހިންގުމުގައި ބައިވެރިވި އެންމެން ހޯދާ އެ ފަރާތްތަކަށް ހައްގު އަދަބު ދިނުން އަވަސް ކުރުމަށް ގޮވާލަމެވެ. މިއަމަލުގެ ފަހަތުގައިވާ ހުރިހާ ކަމެއްގެ ހަގީގަތް ހޯދާ، ރައްޔިތުންގެ ސަލަމާތާއި ރައްކާތެރިކަން ކަށަވަރު ކޮށްދިނުމަށްވެސް ގޮވާލަމެވެ." ބަޔާން ނިންމާލަމަށް ބުނެފައިވެ އެވެ.

ރާއިފް މަރާލި މައްސަލާގައި އެމްޑީޕން ވެސް މިއަދު ކަންބޮޑުވުން ފާޅުކޮށް ކުށްވެރިންނަށް ހައްގު އަދަބު ދިނުމަށް ގޮވާލާފައިވެ އެވެ.