އިންޑިއާގައި ފާއިތުވި 24 ގަޑިއިރު ތެރޭގައި ބައިލައްކައަށް ވުރެ ގިނަ މީހުނަށް މުޅިން އަލަށް ކޮވިޑް ޖެހުނު ކަމަށް ރެކޯޑް ކުރެވިފައި ވެއެވެ. އިންޑިއާގެ މިނިސްޓްރީ އޮފް ހެލްތު އެންޑް ފެމެލީ ވެލްފެއާއިން ބުދަ ދުވަހު ބުނި ގޮތުން އިންޑިއާގެ ކޮވިޑް އާބާދީ 30،028،709 އަށް ވަނީ އަރާފަ އެވެ.
އެމެރިކާގެ ޖޯންސް ހޮޕްކިންސް ޔުނިވާސީޓީގެ ތަފާސްހިސާބުތަކުން އިންޑިއާގެ އަދަދުތައް 30 މިލިއަނަށް ވުރެ އިތުރު ކަމަށް ދެއްކި ނަމަވެސް ކުރީގައި އުޅެނީ އެމެރިކާ އެވެ. އެމެރިކާގައި 33،565،289 މީހުނަށް ކޮވިޑް ޖެހުނު ކަމަށް ރެކޯޑްތަކުން އެނގެ އެވެ.
އިންޑިއާގައި ކޮވިޑްގައި މަރުވި މީހުން ވެސް އުޅެނީ ކަންބޮޑުވާ ހިސާބުގަ އެވެ. ރެކޯޑްތަކުން ދައްކާ ގޮތުން ފާއިތުވި 24 ގަޑިއިރު ތެރޭގައި މަހަރަޝްތުރާއިން 482 މީހުން ވަނީ މަރުވެފަ އެވެ. ޓަމިލް ނާޑޫއިން 194 މީހުން ކެރެލާއިން 141 އަދި ކަރުނާޓަކާއިން 139 މީހުންނެވެ،
ހެލްތު މިނިސްޓްރީން ބުނީ ކޮވިޑުން ރަނގަޅުވާ އަދަދަށް ވެސް ހެޔޮ ބަދަލު އަންނަ ކަމަށެވެ. އެގޮތުން އިއްޔެ 68،817 މީހުން ރަނގަޅުވެގެން ދޫކޮށްލި ކަމަށް ވަނީ ބުނެފަ އެވެ. އިންޑިއާއިން ކޮވިޑްގައި ރަނގަޅުވި އަދަދަކީ 28،994،855 އެވެ.
އިންޑިއާއަކީ ކޮވިޑް ހާލަތު ކުރީކޮޅު ވަރަށް ރަނގަޅަށް މެނޭޖުކުރި ގައުމެކެވެ. އަވަށްޓެރި ގައުމެއްގައި ހާލަތު އެހާ ރަނގަޅަށް އޮތުމުން ސަރަހައްދީ އުފަލެއް ގޮތުގައި އެއިރު އޮތީ ބެލެވިފަ އެވެ. އެހެން ނަމަވެސް އިންޑިއާގައި ބޭއްވި އިންތިހާބަކާ ގުޅިގެން މީހުން އެއްތަނަކަށް އެއްވެ ކެމްޕޭންކޮށް ސައި ބޮއެ ދުފައި ހަދަން ފެށުމުން ހާލަތު އަތުން ދޫވީ އެވެ.