މޯލްޑިވްސް ކުއެލިފިކޭޝަން އޮތޯރިޓީ (އެމްކިއުއޭ) އިން ހުއްދަދޭ ކޯސްތައް އޮތޯރިޓީގެ ގަވާއިދާ ހިލާފަށް ހިންގާނަމަ ކޯސްތަކުގެ ހުއްދަ ބާތިލުކުރަން ޖެހިދާނެ ކަމަށް އެ އޮތޯރިޓީން ބުނެފި އެވެ.
އެމްކިއުއޭ އިން މިއަދު ނެރުނު ނޫސް ބަޔާނެއްގައި ބުނީ، "ފުލްޓައިމް" ކޯހުގެ ގޮތުގައި އެމްކިއުއޭ އިން ހުއްދަ ދޫކުރާ ކޯސްތައް ބައެއް ކޮލެޖް ޔުނިވަސިޓީތަކުން "ޕާޓްޓައިމް" ކޮށް ހިންގާކަމުގެ މައުލޫމާތު އެ އޮތޯރިޓީއަށް އިތުބާރު ހުރި ގޮތަކަށް ލިބިފައިވާ ކަމަށެވެ.
ފުލްޓައިމް ކޯސްތަކަށް، ޕާޓް ޓައިމް އިންތިޒާމްގައި މަދު ދުވަސްތަކެއްގައި ދަރިވަރުން ހާޒިރުކޮށް، ކިޔަވައިދޭން ހުއްދަ ދީފައިވާ ވަރަށް ވުރެ މަދުން ކިޔަވައިދިނުމަށްފަހު ވެސް، ބައެއް ކޮލެޖް ޔުނިވަސިޓީތަކުން އެމްކިއުއޭއިން ހުއްދަކުރާ މިންގަނޑަށް ކިޔަވައިދޭ ކަމަށް ދައުވާކުރާ ކަމަށާ، އެގޮތަށް ކިޔަވައިދިނުމަށްފަހު އެއީ އެމްކިއުއޭ އިން ހުއްދަ ދޭ ގޮތް ކަމަށް ބުނެ މައުލޫމާތު ފަތުރާ ކަމަށް ވެސް އެ އޮތޯރިޓީން ބުންޏެވެ.
ނަމަވެސް ފުލް ޓައިމްގެ ގޮތުގައި އެމްކިއުއޭ އިން ހުއްދަ ދޫކުރާ ކޯސްތައް ޕާޓްޓައިމްކޮށް ހިންގުމަކީ އެ އޮތޯރިޓީގެ ގަވާއިދުތަކާއި ހިލާފުވުން ކަމަށާ، އެކަން މިހާރު ކޮލެޖް ޔުނިވަސިޓީތަކަށް އަންގާފައިވާ ކަމަށް އެމްކިއުއޭ ގެ ބަޔާނުގައި ބުންޏެވެ.
"މި އޮތޯރިޓީން ހުއްދަ ދީފައިވާ ކޯސްތައް ހިންގުމުގައި މަތީގައި ބަޔާންކޮށްފައިވާ ަންކަމަށް ސަމާލުކަން ދިނުމަށް ޔުނިވަސިޓީތަކާ ކޮލެޖްތަކަށް، އަދި ތާޝަރީ އިންސްޓިޓިއުޓްތަކަށް މިހާރު ވާނީ އަންގާފަ އެވެ. ރާއްޖޭގެ މަތީ ތައުލީމުގެ ފެންވަރު ދަށްވެގެންދާ މިފަދަ ކަންކަމާ ކޯސް ހިންގުމުގެ ހުއްދައާ ހިލާފު ކަންތައް ކުރާކަން މި އޮތޯތިޓީއަށް ފާހަގަކުރެވޭ ނަމަ ކޯސް ހިންގަން ދީފައިވާ ހުއްދަ ބާތިލު ކުރަން ވެސް ޖެހިދާނެ،" ބަޔާނުގައި ބުނެފައިވެ އެވެ.
-މަތީ ތައުލީމަށް ކިޔަވައިދޭ މާލޭގެ ކޮލެޖެއް-