ފުވައްމުލަކުގެ މަގުތައް ހެދުމުގެ 50 ޕަސަންޓް ނިމިފައިވާ ކަމަށް އެ މަޝްރޫއު ކުރިއަށްގެންދާ އެމްޓީސީސީން ބުނެފި އެވެ.
އެމްޓީސީސީން މިއަދު ކުރި ޓުވީޓެއްގައި ބުނީ މަގު ހެދުމުގެ މަޝްރޫއުގެ 50 ޕަސެންޓް ނިންމާ، އެ މަޝްރޫއުގެ ދަށުން ހަރުކުރާ ސެޓްލެމެންޓް ޓޭންކު ހަރުކުރުމުގެ މަސައްކަތުގެ 71 ޕަސެންޓް ނިމިފައިވާ ކަމަށެވެ. އޭގެ އިތުރުން އިލެކްޓްރިކަލް ޖަންކްޝަން ފޮށި ހަރުކުރުމުގެ މަސައްކަތުގެ 70 ޕަސެންޓްވެސް ނިމިފައިވާ ކަމަށެވެ.
ފުވައްމުލަކު ސިޓީގެ އެތެރޭގެ މަގުތައް ހަދަން އެމްޓީސީސީއާ ހަވާލުކުރީ ޖުލައި، 2019 ގައެވެ. ދެ އަހަރުގެ ތެރޭގައި މަސައްކަތް ނިންމަން އެމްޓީސީސީއާ ހަވާލުކުރީ 279.4 މިލިއަން ރުފިޔާ އަށެވެ.
މިމަޝްރޫއުގެ ދަށުން ފުވައްމުލަކުގެ 31 މަގުގައި، 15،932 މީޓަރުގެ ސަރަހައްދެއް ތަރައްގީ ކުރަން އޮތީ ނިންމާފަ އެވެ. އަދި 122،659 ސްކުއެއާ މީޓަރުގެ ސަބް ބޭސް ހެދުމާއި، 95،239 ސްކުއެއާ މީޓަރުގެ ތާރު އެޅުމާއި، ޕޭވްމެންޓް ހެދުމާއި، މަގުތަކުގައި ބައްތި ހަރުކުރުމާއި އަދި ފެން ހިންދާ ނިޒާމު ގާއިމްކުރުންވެސް މަޝްރޫއުގެ ތެރޭގައި ހިމެނެއެވެ.