ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކޮންސަލްޓަންޓެއްގެ މަގާމަށް ސޯޝަލްމީޑިއާ އެކްޓިވިސްޓް ސޫޒަން އިބްރާހީމްފުޅު ހަމަޖައްސައިފި އެވެ.
އެސްޓީއޯގެ ކޮންސަލްޓަންޓެއްގެ މަގާމަށް ސޫޒަން ހަމަޖެއްސީ މީގެ ތިން މަސް ކުރިން ކަމަށް މައުލޫމާތު ލިބިފައިވެ އެވެ.
ކޮންސަލްޓަންޓެއްގެ ގޮތުގައި އޭނާ މައިގަނޑު ގޮތެއްގައި މަސައްކަތް ކުރައްވާނީ އެސްޓީއޯ ޕީޕަލްސް ޗޮއިސް އަދި އެސްޓީއޯ އެގްރި ބިޒްނަސްގަ އެވެ.
ކޮންސަލްޓަންޓެއްގެ ގޮތުގައި ސޫޒަން މުސާރައާއި އިނާޔާތުގެ ގޮތުގައި ލިބިވަޑައިގަންނަވާ އަދަދުތައް ވަނީ ސާފުވާ ގޮތް ނުވެފަ އެވެ.
ސޫޒަން ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި އުފެއްދެވި ޕްރޮވިންސް ތަކުގެ ތެރެއިން މަތި ދެކުނު ޕްރޮވިންސްގެ ޕްރޮޖެކްޓް ޑިރެކްޓަރުކަން ކުރައްވާފަ އެވެ.
އެމްޑީޕީން އުފެއްދިއްސުރެ އެޕާޓީގައި ހަރަކާތްތެރި މެންބަރެއްގެ ގޮތުގައި ފާހަގަކުރެވޭ ސޫޒަން މީގެ ކުރިން ވަނީ މިނިވަން ނޫހުގައި ނޫސްވެރިއެއްގެ ގޮތުގައި ވެސް މަސައްކަތް ކޮށްފަ އެވެ.
ރާއްޖޭގެ ގައުމީ ޓީމުގެ ކެޕްޓަން އަކްރަމް އަބްދުލްޣަނީ އާއި އަލީ އަޝްފާގު (ދަގަނޑޭ)އާ ދިމާލަން ދާދި ފަހުން ސޫޒަން ބޭނުންކުރި ބޭއަދަބީ ބަސްތަކަކާ ގުޅިގެން އެފްއޭއެމުން ވަނީ އެ މައްސަލަ ބަލައިދިނުމަށް މީގެކުރިން ކަމާ ގުޅޭ އިދާރާތަކަށް ގޮވާލާފަ އެވެ.