ކޮވިޑް-19އާ ގުޅިގެން ރައްކާތެރިކަމުގެ ފިޔަވަަޅެއްގެ ގޮތުން ގޭގެއިން ބޭރަށް ކުނި ނެރެން އެންގި އެންގުން ނިމުމަކަށް ގެނައުމަށް ނިންމާފައިވާ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވި ނަމަވެސް އެފަދަ ނިންމުމެއް އަދި ނެތް ކަަމަށް ވެމްކޯއިން ބުނުމުން، ދޮގު ވާހަކަ ނުދެއްކުމަށް މުއިއްޒު އެދިވަޑައިގެންފި އެވެ.
މުއިއްޒު މިއަދު ކުރެއްވި ޓްވީޓެއްގައި ވިދާޅުވެފައިވަނީ ދޮގު ބަޔާންތައް ނެރުމަކީ ވަރަށް ޒިންމާދާރުކަން ކުޑަކަމެއް ކަމަށެވެ. އަދި ކުނި ނެގުމުގެ ކަންކަން ބަދަލު ކުރުމާ ގުޅޭގޮތުން މާލެ ސިޓީ ކައުންސިލާއި ވެމްކޯއާ ދެމެދު މަޝްވަރާ ކޮށްފައިވާނެ ކަމަށް ވެސް ވިދާޅުވި އެވެ.
މޭޔަރު މުއިއްޒު ވިދާޅުވީ ވެމްކޯގެ ޓީމުން ވަނީ ކައުންސިލުން ހުޅަހެޅި ބަދަލުތައް ގެންނަށް އެއްބަސްވެފައި ކަމަށެވެ. އެހެންކަމުން އެ ބަހުގައި ދެމިހުންނާނެ ކަމަށް އުންމީދު ކުރާ ކަމަށް ވެސް ވިދާޅުވެފައިވެ އެވެ.
ތާޖުއްދީން ސްކޫލުގައި ބުރާސްފަތި ދުވަހުގެ ރޭ ބޭއްވި މާފަންނު ރައްޔިތުންގެ ބައްދަލުވުމުގައި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ ކުރިންވެސް އަމަލު ކުރަމުން އައި އުސޫލުން ގޭގެއަށް ވަދެ ކުނި ނަގަން ފަށަން ޖެހޭ ކަމަަށެވެ. އަދި އެކަމާއި ގުޅޭގޮތުން ވެމްކޯއާއެކު މަޝްވަރާ ކުރަމުންދާ ކަމަށެވެ.
މުއިއްޒު ވިދާޅުވީ މި މަހުގެ 21 ވަނަ ދުވަހުން ފެށިގެން އެ ގޮތަށް އަމަލު ކުރަން މިހާރު ނިންމާފައިވާ ކަމަށެވެ.
ނަމަވެސް ވެމްކޯއިން ރޭ ނެރެފައިވާ ނޫސްބަޔާނެއްގައި ބުނެފައިވަނީ ކޮވިޑް-19 އިން ރައްކާތެރިވުމަށް އެޅި ހާއްސަ ފިޔަވަޅެއްގެ ގޮތުން އޭޕްރީލް 16، 2020 އިން ފެށިގެން މާލެ ސަރަހައްދުގައި ކުނި ނަގާ އުސޫލު ބަދަލުކޮށްފައިވާއިރު އެކަމަށް އިތުރު ބަދަލެއް އަދި ގެނެސްފައި ނުވާ ކަމަށެވެ. އެހެންކަމުން އުސޫލަށް ބަދަލު ގެންނާނެ ކަމަށް ބުނެ ދެކެވޭ ވާހަކަތަކަކީ ސައްހަ ވާހަކަތަކެއް ނޫން ކަމަށްވެސް ވެމްކޯ އިން ބުނެފައިވެ އެވެ.