ހުޅުމާލޭގައި ހިއްކާފައިވާ ދެވަނަ ފިޔަވައްސައް އާންމުންނަށް ވަދެވޭ ސަރަހައްދު ހިޔާ ފްލެޓްތަކާއި ހަމައަށް ހައުސިން ޑިވޮލަޕްމެންޓް ކޯޕަރޭޝަން (އެޗްޑީސީ) އިން އިތުރުކޮށްފި އެވެ.
އެޗްޑީސީގެ އޮފިޝަލަކު މިއަދު އަވަސް އަށް ވިދާޅުވީ ދެވަނަ ފިޔަވަހި އެއްކޮށް ހުޅުވާނުލާ ކަމަށެވެ. ނަމަވެސް ކުރިއަށް ވުރެ ބޮޑު ބަޔަކަށް ހުއްދައަކާ ނުލައި މިހާރު ވަދެވޭނެ ކަމަށެވެ. އެޗްޑީސީން ހުޅުވާލާފައިވާ ހިޔާ ފްލެޓްތަކާއި ހަމައަށެވެ.
މިއަދު ފްލެޓްތަކަށް ދާއިމީ ކަރަންޓު ވެސް ވަނީ ގުޅާފަ އެވެ. އެހެންކަމުން ފިނިޝިންގެ މަސައްކަތް ކުރަން ބޭނުންވާ ފަރާތްތަކަށް އެ ފުރުސަތު ލިބިގެންދާނެ އެވެ. ދެވަނަ ފިޔަވަހި ހުޅުވާލާފައި ވަނީ ފްލެޓްގެ ވެރިންގެ މަސައްކަތް މިއަދު ފަށާނެތީ ކަމަށް ވެސް އޮފިޝަލު ވިދާޅުވި އެވެ.
ހުޅުމާލެއަކީ ވަކި މާސްޓާޕްލޭނެއްގެ ދަށުން ތަރައްގީ ކުރަމުންދާ ރަށެއްކަން ފާހަގަކޮށް އެޗްޑީސީން ބުނީ ރެސިޑެންޝަލް، ކޮމާޝަލް، އިންޑަސްޓްރިއަލް، އަދި ކޮމިއުނިޓީ ބޭނުންތަކަށް ހުޅުމާލެއިން ޖާގަ ދޫކުރެވެން އޮތް މިންވަރަކުން ޖާގަ ދޫކުރާނެ ކަމަށެވެ. އަދި އެންމެ ބޮޑަށް މަސައްކަތް ކުރަނީ އާންމު ރައްޔިތުންނަށް ބޯހިޔާވަހިކަން ފޯރުކޮށްދިނުމަށްޓަކައި ސޯޝަލް އަދި އެފޯޑަބަލް ހައުސިން މަޝްރޫއުތަކަށެވެ.
ހުޅުމާލޭގެ ދެވަނަ ފިޔަވަހީގެ 240 ހެކްޓަރުގެ ބިން ހިއްކާފައިވަނީ 2017 ވަނަ އަހަރު ރައީސް އަބްދުﷲ ޔާމީންގެ ސަރުކާރުގެ އެވެ. އަދި ދެވަނަ ފިޔަވަހީގައި ހިންގާފައިވާ ބޯހިޔާވަހިކަމުގެ ބިޔަ މަޝްރޫއު، ހިޔާ ފްލެޓްތަކަކީ ވެސް ރައީސް ޔާމީންގެ ވެރިކަމުގައި އަޅާފައިވާ ފްލެޓްތަކެކެވެ.