"މިމީ"އަށް ލިބުނު ހީނުކުރާ ވަރުގެ ބޮޑު ކާމިޔާބުން އެ ފިލްމުގެ ބަތަލާ ކްރީތީ ސެނޯން މިހާރު ހުރީ އުފަލުން ފޮޅިފަ އެވެ. ކްރީތީ އެންމެ އުފާވަނީ ފިލްމު ބެލި އެންމެނާއި ފިލްމުތަކަށް ފާޑު ކިޔާ މީހުން ވެސް އޭނާގެ ފިލްމަށާއި އެ ފިލްމުގައި އޭނާ ކޮށްފައިވާ މަސައްކަތަށް ތައުރީފު ކުރާތީ އެވެ.
"މިމީ" އަކީ ކްރީތީގެ ފިލްމީ ކެރިއަރުގައި އޭނާއަށް ކުރެވިފައިވާ އެންމެ ފުރިހަމަ މަސައްކަތެވެ. ކްރީތީ ސެނޯން އަކީ މީހުން ހީކުރާ ވަރުގެ އާދައިގެ ބަތަލާއެއް ނޫންކަން މި ފިލްމުން ކްރީތީ ވަނީ ސާބިތު ކޮށްދީފަ އެވެ.
ފިލްމު އާ ރެކޯޑްތަކެއް ގާއިމްކޮށްފައިވާއިރު ކްރީތީ އާއި ފޭނުން މިހާރު ގެންދަނީ ފިލްމުގެ ކާމިޔާބު ފާހަގަ ކުރަމުންނެވެ.
ފިލްމުތަކަށް ރޭޓިން ދޭ އައިއެމްޑީބީގެ ރޭޓިންގައި "މިމީ" އުޅެނީ އަންހެނަކު އެންމެ މުހިއްމު ރޯލު ކުޅުނު ފިލްމުތަކުގެ ތެރެއިން 2021 ގައި ނުކުތް އެއްވަނައިގަ އެވެ. "މިމީ" ގެ އައިއެމްބީޑީ ރޭޓިން އަކީ 8.3 އެވެ. މިއީ ބޮލީވުޑްގައި އުފައްދާފައިވާ ބަތަލާއިން މައިގަނޑު ރޯލު ކުޅުނު ފިލްމުތަކުގެ ތެރެއިން އެންމެ މަތީ ރޭޓިން ލިބުނު ފިލްމެވެ.
މި ވައްތަރުގެ ފިލްމުތަކުގެ ތެރެއިން ވިދްޔާ ބާލަންގެ "ޑާޓީ ޕިކްޗާޒް" ގެ ރޭޓިން އަކީ 6.6 އެވެ. ކަންގަނާ ރަނާވަތުގެ "ކްއީން" ގެ ރޭޓިންއަކީ 8.2 އެވެ. އާލިއާ ބަޓްގެ "ރާޒީ" ގެ ރޭޓިން އަކީ 7.8 އެވެ. އަދި ދީޕިކާ ޕަދުކޯންގެ "ޕީކޫ" ގެ ރޭޓިންއަކީ 7.6 އެވެ. އެހެންކަމުން ކްރީތީ މިވަނީ މިހާރު ބޮލީވުޑްގެ އެންމެ ކުރީގައި އުޅޭ އަންހެން ބަތަލާއިންގެ ފިލްމުތަކުގެ ރެކޯޑުތައް ވެސް މުގުރާލާފަ އެވެ.
މީގެ ހަތް އަހަރު ކުރިން ފިލްމު ކުޅެން ފެށި ކްރީތީއަކީ ފިލްމީ އާއިލާއަކަށް ނިސްބަތްވާ ބަތަލާއެއް ނޫނެވެ. މިހާރު ފިލްމު ކުޅޭ އެއްވަނަ ދަރަޖައިގެ އެކްޓަރުންނާއެކު ފިލްމު ކުޅުމުގެ ފުރުސަތުތައް ކްރީތީ އަށް ތަނަވަސްވެފައި ވަނީ ހަމައެކަނި އޭނާގެ ހުނަރާއި މަސައްކަތުންނެވެ.
މިހާރުވެސް ވަރަށް ރަނގަޅު ފިލްމުތަކެއް ކްރީތީ ދަނީ ކުޅެމުންނެވެ. އޭގެ ތެރޭގައި "އަޑިޕުރުޝް"، "ބައްޗަން ޕާންޑޭ"، "ބީޅިޔާ"، "ގަންޕަތު"، "ހަމް ދޯ ހަމާރޭ ދޯ" ފާހަގަ ކޮށްލެވެ އެވެ.