މިއަހަރު ރާއްޖޭގައި ކުޅުމަށް ހަމަޖެހިފައިވާ ސާފް ޗެމްޕިއަންޝީޕްގެ ތާވަލަށް ބަދަލުތަކެއް ގެނެސްފި އެވެ.
މީގެ ކުރިން ހަދާފައިވާ ތާވަލުގައި މުބާރާތް ކުޅުމަށް ހަމަޖެހިފައި ވަނީ އޮކްޓޫބަރު އެކަކުން 13 އަށެވެ. ނަމަވެސް މިހާރު ގެނެސްފައިވާ ބަދަލާއި އެކު މުބާރާތް ކުރިއަށް ދާނީ އޮކްޓޫބަރު އެކަކުން 16 އަށެވެ. އެހެންކަމުން މީގެ ކުރިން 13 ވަނަ ދުވަހު ކުޅެން އޮތް ފައިނަލް މެޗު އޮންނާނީ 16 ވަނަ ދުވަހު އެވެ.
މުބާރާތުގެ ތާވަލަށް މި ބަދަލު ގެންނަން ޖެހުނީ ފީފާގެ އުސޫލުތަކަށް ފެއްތުމުގެ ގޮތުން، ދެމެޗު ދޭތެރޭގައި ރެސްޓު ކުރުމަށް ގިނަ ވަގުތު ދިނުމުގެ ގޮތުންނެވެ. މީގެ ކުރިން ހަދާފައިވާ ތާވަލުގައި ކޮންމެ ދެމެޗެއް ދޭތެރޭގައި ޓީމު ތަކަށް ރެސްޓު ކުރަން ދެ ދުވަސް ލިބެ އެވެ. ނަމަވެސް އާ ތާވަލާއި އެކު ކޮންމެ ޓީމަކަށް ވެސް ރެސްޓު ކުރުމަށް ތިން ދުވަސް ލިބިގެންދާނެ އެވެ.
މިފަހަރުގެ މުބާރާތުގައި ބައިވެރިވާނީ ފަސް ޓީމުންނެވެ. އެހެންކަމުން މީގެ ކުރިން ދެ ގްރޫޕަކަށް ބަހައިގެން މުބާރާތް ކުޅުނު ނަމަވެސް މިފަހަރު ކުރިއަށް ދާނީ ލީގު އުސޫލުންންވެ. އަދި އެންމެ ގިނަ ޕޮއިންޓު ހޯދާ ދެޓީމެއް ފައިނަލުގައި ވާދަ ކުރާނެ އެވެ. މިފަހަރުގެ މުބާރާތުގައި ބައިވެރިވާނީ ދިވެހިރާއްޖެ، ސްރީ ލަންކާ، އިންޑިއާ، ނޭޕާލް އަދި ބަންގްލަދޭޝް އެވެ. ފީފާގެ ސަސްޕެންޝަނެއްގައި އޮތުމުން މިފަހަރުގެ މުބާރާތުގައި ޕާކިސްތާނަށް ނުކުޅެވޭނެ އެވެ. އަދި ބޫޓާނުގައި ކޮވިޑްގެ ހާލަތު ގޯސް ވުމުގެ ސަބަބުން ޒަރޫރީ ބޭނުންތަކުގައި ފިޔަވައި އެގައުމުން ބޭރަށް ދިޔުން މަނާ ކޮށްފައި ވާތީ ބޫޓާން ވެސް މިމުބާރާތުގައި ބައިވެރި ނުވާނެ އެވެ.
ތާވަލަށް މިބަދަލު ގެނެވުނު ނަމަވެސް ޓީމުތައް ކުޅެން ނިންމާފައިވާ ތަރުތީބަށް ބަދަލެއް ނާދެ އެވެ. އެހެންކަމުން ފުރަތަމަ މެޗުގައި ވާދަކުރާނީ ރާއްޖެ އާއި ނޭޕާލެވެ. އެންމެ ފަހުގެ ސާފް ޗެމްޕިއަންޝިޕްގައި ރާއްޖެއިން މުބާރާތުގެ ފައިނަލަށް ދަތުރު ކުރީ ސެމީ ފައިނަލުގައި 3-0 އިން ނޭޕާލު ބަލި ކުރުމަށްފަހު އެވެ.
ރާއްޖޭގެ ދެވަނަ މެޗުގައި އޮކްޓޫބަރު މަހުގެ ހަތްވަނަ ދުވަހުގެ ރޭ ބައްދަލު ކުރާނީ ބަންގްލަދޭޝްއާ އެވެ. އޭގެ ފަހުން 10 ވަނަ ދުވަހުގެ ހަވީރު ސްރީލަންކާ އާއި ބައްދަލުކުރުމަށްފަހު 13 ވަނަ ދުވަހު ބައްދަލުކުރާނީ ވަރުގަދަ އިންޑިއާ އާއި އެވެ. އެންމެ ފަހުން ބޭއްވި ސާފް ޗެމްޕިއަންޝިޕްގައި ރާއްޖެއިން މުބާރާތް ކާމިޔާބު ކުރީ ފައިނަލުގައި އިންޑިއާ އަތުން 2-1 އިން މޮޅުވެގެންނެވެ.
މިއީ ރާއްޖޭއިން ސާފް ޗެމްޕިއަންޝިޕް ހޯސްޓު ކުރާ ދެވަނަ ފަހަރެވެ. ރާއްޖެއިން ފުރަތަމަ ފަހަރަށް މުބާރާތް ހޯސްޓު ކުރީ 2008 ވަނަ އަހަރު އެވެ. އެފަހަރުގެ މުބާރާތް ރާއްޖެއިން ހޯސްޓު ކުރީ އަވައްޓެރި ސްރީލަންކާ އާއި ގުޅިގެންނެވެ.