ފިލްމު އިންޑަސްޓްރީގައި އެތައް އަހަރެއްގެ މަސައްކަތް ކޮށްފައި ވިޔަސް އަދިވެސް އަމީތާބު ބައްޗަން ކުޅޭ ކޮންމެ ފިލްމެއް ވެސް ކުޅެނީ ވަރަށް ފޯރިއާއި ޖޯޝުގައި ކުޅޭ ހިތުންނެވެ. އަމީތާބު ބުނާ ގޮތުގައި ސިނަމާގެ ދަތުރަކީ އޭނާގެ ހިތަށް ވަރަށް އުފާވެރިކަން ލިބޭ ދަތުރެކެވެ. އާ ފިލްމެއް އާ ސްކްރިޕްޓެއް ލިބޭ ކޮންމެ ފަހަރަކު ހިތުގައި އުފެދޭ ޝުއޫރުތަކަކީ ބަޔާން ކޮށްދޭން ވެސް ނޭނގޭ ޝުއޫރުތަކެއް ކަމަށް ވެސް އަމީތާބު ބުންޏެވެ.
"ކޮންމެ އާ ފިލްމަކާއެކު ހިތަށް އަރާނެ ކޮން ކަހަލަ ވާހަކައެއް ބާއޭ ކޮން ކަހަލަ ރޯލެއް ބާއޭ އަހަންނަށް އެ ފިލްމުގައި އޮންނާނީ. އަހަރެން ކުރިޔަށް ދަނީ އެފަދަ ޝުއޫރުތައް އަބަދުވެސް ހިތުގައި އެނބުރި އެނބުރި ތިބޭ ހާލުގައި،" އަމީތާބު ބުންޏެވެ.
އަމީތާބު މި ވާހަކަ ދެއްކީ އޭނާ ކުޅެ ނިމި މިހާރު ރިލީޒް ވުމަށް ތައްޔާރުވަމުންދާ "ޗެހެރޭ" ގެ ޕްރޮމޯޝަން އިވެންޓެއްގަ އެވެ. އަމީތާބު ބުނީ "ޗެހެރޭ" ގެ ޑައިރެކްޓަރު ރޫމީ ޖެފްރީގެ ސްކްރިޕްޓް އަޑުއިވުމާއެކު އޭނާ ވަގުތުން އެ ފިލްމުގައި ބައިވެރިވާން ނިންމި ކަމަށެވެ.
"އެ ފިލްމުގެ ވާހަކަ ރޫމީގެ އަތުގައި އޮންނަތާ ވަރަށް ގިނަ ދުވަސް ވެއްޖެ. ދުވަސް ދުވަސް ކޮޅުން އޭނާ ގުޅާފަ ބުނާނެ އެ ފިލްމުގެ ނެރޭޝަނެއް ދޭން ބޭނުމޭ. އެންމެ ފަހުން އަހަރެން އޭނައަށް އެ ފުރުސަތު ދިނުމުން އޭނާ ފިލްމުގެ ވާހަކަ ކިޔައިދީ ނިމުނުއިރު އަހަރެން ހުރީ އެ ފިލްމުގައި ބައިވެރި ވެގެން،" އަމީތާބު ބުންޏެވެ.
އަމީތާބު ބުނި ގޮތުގައި ރޫމީ ޖެފްރީއާ ބެހޭ ގޮތުން ގިނަ މީހުންނަށް އިވިފައި އޮންނަނީ ކޮމެޑީ ފިލްމު އުފައްދާ ޑައިރެކްޓަރެއްގެ ގޮތުގަ އެވެ. ނަމަވެސް މިއީ ރޫމީގެ މުޅިން ތަފާތު ފިލްމެއް ކަމަށް އަމީތާބު ބުންޏެވެ.
ފިލްމުގައި ހަރަކާތްތެރިވާ އަނެއް ބަތަލަކީ އިމްރާން ހާޝިމީ އެވެ. އޭނާ ބުނި ގޮތުގައި ކުޑައިރުއްސުރެ އަމީތާބުގެ ފިލްމުތައް ބަލަމުން އައިސް ބޮޑުވެ ފިލްމު ކުޅެން ފަށައި އަމީތާބާއެކު ފިލްމު ކުޅޭނެ ފުރުސަތު ލިބުމުން އިންތިހާއަށް ހިތް ނުތަނަވަސްވި ކަމަށެވެ. އަދި އެ ހާސްކަމުގައި އެންމެ ފަހަރަކުވެސް ޑައިލޯގް ހަނދާން ނެތޭކަށް އޭނާ ބޭނުމެއް ނުވި ކަމަށް ވެސް އިމްރާން ބުންޏެވެ.
އަމީތާބުގެ އެންމެ ޚާއްސަ ސިފައެއްގެ ގޮތުގައި އިމްރާން ފާހަގަ ކުރީ އޭނާ ބައިވެރިވާ ކޮންމެ ފިލްމަކަށް ވެސް 100 ޕަސެންޓް ދޭ ދިނުމެވެ. އޭނާއަށް ވީ އެންމެ ފުރިހަމައަކަށް ހުރިހާ ވަގުތެއް ހުސްކޮށްގެން އަމީތާބު ފިލްމު ކުޅޭތަން ފެނުމަކީ އިމްރާނަށް ކުރެވުނު މުޅިން އާ ތަޖުރިބާއެކެވެ.
ފިލްމު ކުޅެ ކުޅެ މުސްކުޅިވީއިރު ވެސް އަމީތާބު އާ އެއްވަރަށް ރޯލަށް ތައްޔާރުވާ އަދި ފަރިތަކުރާ އެކްޓަރެއް މަދެވެ. އަމީތާބު ބުނި ގޮތުގައި ޅައިރު ދިގު ޑައިލޯގްތައް ހަނދާން ބެހެއްޓުނަސް މިހާރު އެކަމެއް ނުވެ އެވެ. އެހެންވެ މާ ގިނަގިނައިން މަންޒަރުތަކުގެ ރިހާސަލް ބާއްވަން މިހާރު ޖެހެ އެވެ.
"މި އުމުރުގައި ކިހިނެއް ކިޔަން ޖެހޭ ލައިންތައް ހަނދާނުގައި ބަހައްޓާނީ. އެހެންވެ އެ ޑައިލޯގްތައް ރަނގަޅަށް ހިތަށް ވަންނަން ދެން އަހަރެން ޕްރެކްޓިސް ކުރަން. އަހަރެންގެ ބައެއް ކޯސްޓާރުން ބުނާނެ އަހަރެން މާގިނައިންނޭ ރިހާސަލް ބާއްވަނީ. އަހަރެން އެމީހުން ކައިރީ ބުނަން އަހަރެމެން މި ކުރާ ގޮތަށް އަހަރެން ކަންތައް ކުރިޔަ ދޭށޭ. ހަމަ ހަގީގަތުގައި ވެސް މި އުމުރުގައި އަހަންނަށް އެގޮތަށް ކަންތައް ކުރަން ވަރަށް މުހިއްމު،" އަމީތާބު ބުންޏެވެ.