ސަރުކާރުގެ އޮފީސް އިމާރާތްތައް ހުންނަ ވެލާނާގޭގައި ޓޫރިޒަމް މިނިސްޓްރީ ހިންގާ އޮފީހުން ގޮތް ނޭނގޭ އެއްޗެއް ފެނިގެން އެމްއެންޑީއެފްގެ ބޮން ސްކޮޑުން ހަރަކާތްތެރިވާން ފަށަައިފި އެވެ.
އެމްއެންޑީއެފްގެ މީޑިއާ އޮފިޝަލަކު ވިދާޅުވީ ގޮތް ނޭނގޭ އެއްޗެއް ފެނިގެން މިނިސްޓްރީން ރިޕޯޓްކުރުމާއެކު އެއީ ނުރައްކާތެރި އެއްޗެއްތޯ ބަލަން އެމްއެންޑީއެފްގެ ބޮން ސްކޮޑުން ހަރަކާތްތެރިވަމުންދާ ކަމަށެވެ.
ނަމަވެސް ފެނުނީ ކޮން އެއްޗެއް ކަމެއް އެމްއެންޑީއެފުން އަދި ނުބުނެ އެވެ. މިކަމާ ގުޅޭ އިތުރު މައުލޫމާތު ވެސް އަދި ހިއްސާކޮށްފައެއް ނުވެ އެވެ.
އެމްއެންޑީއެފުން ވަނީ އޮފީސްތަކަށް ގެންދާ ގޮތް ނޭނގޭ އެއްޗަކާ އެއްވެސް ފަރާތަކުން ހަވާލުނުވުމަށް ވެސް އިލްތިމާސްކޮށްފަ އެވެ.
ގޮތް ނޭނގޭ އެއްޗެއް ފެނިގެން އެމްއެންޑީއެފްގެ ބޮން ސްކޮޑް ހަރަކާތްތެރިވާން ފެށިއިރު ސުޕްރީމް ކޯޓު ދޮރުމަތިން ރިމޯޓް ކާރެއް ފެނިގެންވެސް އެއީ ނުރައްކާތެރި އެއްޗެއްތޯ ބަލަން އެމްއެންޑީއެފުން ދާދިފަހުން ހަރަކާތްތެރިވި އެވެ. އަދި އޭގެ ކުރިން ރައީސުލްޖުމްހޫރިއްޔާ ދިރިއުޅުއްވާ މުލިއާގެ ގޮއްވާލާނެ ކަމަށް ބަޔަކު ބުނުމުން އެތަނުގައިވެސް ބޮން ސްކޮޑުން ހަރަކާތްތެރިވެ ދެ މީހަކު ހައްޔަރު ކުރި އެވެ.
މަޖިލީހުގެ ރައީސް މުހައްމަދު ނަޝީދަށް "ހައެއް ފަހެއް"ގައި ދިން ޓެރަރިސްޓް ހަމަލާއަށް ފަހު ޓެރަރިސްޓް ހަމަލާއެއް ދީފާނެތީ ސަލާމަތީ ބާރުތަކުން ތިބެނީ ވަރަށް ބޮޑަށް ފާރަވެރިވެގެންނެވެ.