ކުލަބު މޯލްޑިވްސް ކަޕް ފުޓްސަލް މުބާރާތް 32 ޓީމާއެކު އަންނަ އަހަރުގެ މާޗު ބާއްވަން ތާވަލްކޮށްފި އެވެ.
ރާއްޖޭގައި ބާއްވާ އެންމެ ފޯރިގަދަ ފުޓްސަލް މުބާރާތުގައި ކުރިން 36 ޓީމަށް ފުރުސަތު ދެމުން އައި ނަމަވެސް ހަތަރު ޖާގަ އުނިކުރަން ނިންމީ މުބާރާތް ކުރިއަށް ގެންދަން ފަސޭހަކުރުމަށްޓަކަ އެވެ.
މި މުބާރާތުގެ އަންހެން ބައިގައި ބައިވެރިކުރާނެ ޓީމުތަކުގެ އަދަދު މުޅިން ފައިނަލް ނުކުރެ އެވެ.
ކުލަބު މޯލްޑިވްސް ކަޕުގައި އާއްމުކޮށް ބައިވެރިވަނީ ސަރުކާރުގެ އޮފީސްތަކާއި އަމިއްލަ ކުންފުނިތަކުންނެވެ. މި މުބާރާތުގެ މިދިޔަ އަހަރުގެ ޗެމްޕިއަނުންނަކީ އެސްޓީއޯ އެވެ. ހަތަރު ވަނަ ފަހަރަށް އެސްޓީއޯ ތަށި ހޯދީ ފައިނަލުގައި އެލައިޑް އިންޝުއަރެންސް ޕެނަލްޓީ ޖަހައިގެން ބަލިކޮށްފަ އެވެ.
އަންހެން ބައިގެ ޗެމްޕިއަންކަން ހޯދީ އިމިގްރޭޝަން އެވެ. އެއީ ފައިނަލުގައި ޕޮލިސް ކުލަބާ ވާދަކޮށް 6-2އިން މެޗު ކާމިޔާބުކޮށްގެންނެވެ.
