އިންޑިއާގެ މަޝްހޫރު ޓީވީ އެކްޓަރު އަދި ބައެއް ފިލްމުތަކުގައިވެސް މަަސައްކަތްކޮށްފައިވާ ސިދާތު ޝުކްލާ ކުއްލި ގޮތަކަށް މަރުވެއްޖެ އެވެ.
ޓީވީ ސީރީޒް "ބަލިކާ ވަދޫ" އިން މަޝްހޫރުވި ސިދާތު މަރުވި އިރު އުމުރުން 40 އަހަރެވެ. އޭނާ މަރުވީ ހާޓް އެޓޭކެއް ޖެހިގެން މިއަދު ހެނދުނު އެވެ.
"އޭނާ ހޮސްޕިޓަލަށް ގެނައިރުވެސް އޮތީ މަރުވެފައި" ސިދާތު ގެންދިޔަ ކޫޕާ ހޮސްޕިޓަލުގެ އޮފިޝަލަކު ވިދާޅުވި އެވެ.
ސިދާތު ކުއްލި ގޮތަކަށް މަރުވުމުން ބޮލީވުޑްގެ ތަރިންނާއި އަދި އޭނާގެ ފޭނުންނަށްވެސް ވަނީ ކުއްލި ޝޮކެއް ލިބިފަ އެވެ. މިއީ މިދިޔަ އަހަރު މަރުވި ބޮލީވުޑް އެކްޓަރު ސުޝާންތު ރާޖުޕޫތަށް ފަހު އިންޑިއާގެ މުނިފޫހިފިލުވުމުގެ ދާއިރާއަށް ލިބުނު ބޮޑު ގެއްލުމެއް ކަަމަށް ގިނަ ބަޔަކު ވަނީ ސިފަކޮށްފަ އެވެ.
ޓީވީ އެކްޓަރެއްގެ އިތުރުން ސިދާތު އަކީ މަޝްހޫރު މޮޑެލް އެކެވެ. އޭނާ ވަނީ 2005 ވަނަ އަހަރު ބޭއްވި "މިސްޓަ މޮޑެލް އޮފް ދަ ވޯލްޑް" ގައި ބައިވެރިވެ ދުނިޔޭގެ އެތައް ފިރިހެނުންނާ ވާދަ ކޮށް އެންމެ ރީތި ފިރިހެނާގެ މަގާމުވެސް ހާސިލްކޮށްފަ އެވެ.
އޭގެ އިތުރުން ސިދާތު ވަނީ ބިގް ބޮސް އަދި ފިއާ ފެކްޓާ ރިއާލިޓީ ޝޯގައި ބައިވެރިވެ އެ ދެ ޝޯ ވެސް ކާމިޔާބުކޮށްފަ އެވެ.