ފުލުހުން ހިންގަމުންދިޔަ ޑްރަގް އޮޕަރޭޝަނެއްގެ ތެރެއިން ހަމަނުޖެހުން ހިންގައިފި އެވެ.
މި ހަމަނުޖެހުން ހިންގާފައިވަނީ މިއަދު ހަވީރު 4:00 ހާއިރު މާފަންނު ޗިލީސް ކެފޭ ސަރަހައްދުގަ އެވެ.
މިކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ ހަމަނުޖެހުން ހިންގާފައިވަނި ފުލުހުން ޑްރަގް އޮޕަރޭޝަނެއް ކުރިއަށް ދަނިކޮށް ކަމަށެވެ. މިކަމާ ގުޅޭގޮތުން އިތުރު ތަފްސީލެއް ނެތް ކަމަށް އޮފިޝަލު ވިދާޅުވި އެވެ.
މި ހަމަނުޖެހުން ހިންގާފައިވަނީ އާންމުނާއި ފުލުހުންނާ ދެމެދުގަ އެވެ. އެ ސަރަހައްދުގައި ފުލުހުން ކުލަ ހެނދުމުގައި ހަރަކާތްތެރިވަމުން ދިޔަ އެވެ. ހާދިސާއާ ގުޅޭ ވީޑިއޯއެއް ވެސް އަވަސް އަށް ވަނީ ލިބިފަ އެވެ. އެ ވީޑިއޯ އިން ފެންނަނީ ރީނދޫކުލައި ޓީޝާތެއް ލައިގެން ހުރި ފިރިހެނެއް ފުލުހުން ހިފަހައްޓައިގެން އުޅޭ މަންޒަރެވެ. އަދި އާމުންނާއި ފުލުހުންނާއި މެދުގައި އަރައިރުންވާ މަންޒަރެވެ.
ފުލުހުން ވަނީ މާލޭގައި ކެފޭ ހިންގާ އުސޫލުން މަސްތުވާތަކެތީގެ ވިޔަފާރިކުރާ 25 ގެއެއްގެ ވެރިފަރާތަށް ގާނޫނީ އިންޒާރު ވެސް ވަރަށް ފަހުން ދީފަ އެވެ. އަދި އެތަންތަން ބަންދުކުރުމުގެ ހާއްސަ އޮޕަރޭޝަނެއް ވެސް ވަނީ ފަށާފަ އެވެ.
ކެފޭ ހިންގާ އުސޫލުން ޑްރަގް ވިޔަފާރި ކުރާ ތަންތަނަށް މީހުން ވަނަނުދީ ހިފެހެއްޓުމުގެ މަސައްކަތް ވެސް ފުލުހުން ވަނީ ފަށާފަ އެވެ. އަދި ބަންދު ކުރި ތަންތަނުގެ ބޭރުގައި 24 ގަޑިއިރު ފުލުހުން ޑިއުޓީގައި ބައިތިއްބަން ވަނީ ނިންމާފަ އެވެ.