ސަރުކާރުގެ މުވައްޒަފުންނަށް މިދިޔަ އޮގަސްޓް މަހު އިތުރަށް ދެވުނު މުސާރަ އަނބުރާ ދައްކާފައި ނުވާ މުވައްޒަފުންނަށް ދެން މުސާރަ ލިބޭނީ އިތުރަށް ޖަމާކުރެވުނު ބައި މުސާރައިން ކެނޑުމަށްފަހު ކަމަށް ފިނޭންސް މިނިސްޓްރީން ބުނެފި އެވެ.
އަވަސް އަށް މިއަދު މައުލޫމާތު ދެއްވަމުން ފިނޭންސް މިނިސްޓްރީގެ މީޑިއާ އޮފިޝަލް މުހައްމަދު ޝަނޫން ވިދާޅުވީ މިދިޔަ އޮގަސްޓް މަހު މުސާރަ ދެވުނުއިރު 1،796 މުވައްޒަފަކަށް އިތުރަށް މުސާރަ ޖަމާކުރެވުނު ކަމަށެވެ.
އިތުރަށް ޖަމާކުރެވުނު މުވައްޒަފުންނަށް ފައިސާ އަނބުރާ ދެއްކުމަށް އެންގުމުން 32 މުވައްޒަފަކު ފައިސާ ދައްކާފައި ނުވާ ކަމަށްވެސް ޝަނޫން ވަނީ މައުލޫމާތު ދެއްވާފަ އެވެ. އެހެންކަމުން އެފަދަ މުވައްޒަފުންނަށް ކުރިއަށް އޮތް މަހު، މުސާރަ ދޭނީ އިތުރަށް ޖަމާވި ބައި ކަނޑާލުމަށްފަހު ކަމަށް ވިދާޅުވި އެވެ.
"މިސާލަކަށް މިދިޔަ މަހު މުވައްޒަފަކަށް އިނީ އޭނާގެ މުސާރައިގެ އިތުރަށް 7،000 ރުފިޔާ ޖަމާވެފައި. އެހެންކަމަށްވާނަމަ އޭނާގެ މުސާރައިން 7،000 ކަނޑާފައި މުސާރަ ދޭނީ. އެގޮތަށް އަމަލުކުރަން ނޭދޭނަމަ އިތުރަށް މުސާރަ ލިބުނު މުވައްޒަފުންނަށް އަދިވެސް ފުރުސަތު އެބައޮތް އިތުރަށް ލިބުނު ބައި އަނބުރާ ހަވާލުކުރުމަށް،" ޝަނޫން ވިދާޅުވި އެވެ.
މުވައްޒަފުންނަށް އިތުރަށް ޖަމާކުރެވުނީ ކިހާ އަދަދެއްތޯ ތަކުރާރުކޮށް އެހުމުން ވެސް ޝަނޫން ވިދާޅުވީ އެ އަދަދު ހާމަކުރެވެން ނެތް ކަމަށެވެ.
ސަރުކާރުގެ ބައެއް މުވައްޒަފުންނަށް އޮގަސްޓް މަހު އިތުރަށް މުސާރަ ދެވުނުއިރު 34 މުވައްޒަފަކަށް ވަނީ މަދުން ވެސް މުސާރަ ދެވިފަ އެވެ. މަދުން މުސާރަ ލިބުނު މީހުންނަށް އިތުރަށް ދޭން ޖެހޭ ފައިސާ ދީ ނިންމާފައިވާ ކަމަށްވެސް ޝަނޫން ވަނީ ވިދާޅުވެފަ އެވެ.
މުސާރަ ޖަމާކުރުމުގައި އޮގަސްޓް މަހު ދިމާވި ފަދަ މައްސަލައެއް ތަކުރާރު ވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އަޅާފައިވާ ކަމަށްވެސް ފިނޭންސް މިނިސްޓްރީން ވަނީ ބުނެފަ އެވެ.