- ލަންކާއަށް މި އަހަރު 60،000 ދިވެހިން ދިޔަ
- އެ ގައުމުގައި ރާއްޖޭގެ 15،000 އެއްހާ މީހުން އުޅޭކަމަށްވޭ
މިދިޔަ އަހަރާއަޅާ ބަލާއިރު މިއަހަރުގެ މިހާތަނަށް މި އަހަރު މިހާތަނަށް ރާއްޖޭން ސްރީލަންކާ އަށް ދިޔަ މީހުންގެ އަދަދު 3.5 ޕަސެންޓް އިތުރުވެއްޖެ އެވެ.
ސްރީލަންކާ ޓޫރިޒަމް ޑިވްލޮޕްމަންްޓް އޮތޯރިޓީން އާންމުކޮށްފައިވާ ހިސާބުތަކުން ދައްކާ ގޮތުން މިދިޔަ އަހަރުގެ ޖެނުއަރީން އޮކްޓޫބަރު މަހުގެ ނިޔަލަށް ރާއްޖޭން ސްރީލަންކާއަށް 63،938 މީހުން ޒިޔާރަތް ކުރި އެވެ. ނަމަވެސް މި އަހަރުގެ މިހާތަނަށް ރާއްޖޭން ސްރީލަންކާށް ދިޔަ މީހުން އަދަދު މިވަނީ 66،152 މީހުން ޒިޔާރަތް ކޮށްފަ އެވެ. މިއީ ގާތްގަނޑަކަށް 3.5 ޕަސެންޓުގެ ކުރިއެރުމެކެވެ.
ސްރީލަންކާ އަށް އެންމެ ގިނަ މީހުންދާ 10 ގައުމުގެ ތެރޭގައި ރާއްޖެ ހިމެނެ އެވެ. ރާއްޖެއަކީ ސްރީލަންކާއަށް އެންމެ ގިނައިން މީހުންދާ ހަވަނަ ގައުމެވެ.
ސްރީލަންކާއަކީ ރާއްޖޭގެ މީހުން އެންމެ ގިނަ އަދަދަކަށް ދިރިއުޅޭ އެއް ގައުމެއެވެ. ސްރީލަންކާގައި 15،000 މީހުން އުޅޭނެ ކަމަށް ލަފާކުރެވެ އެވެ. އަދި ކޮންމެ އަހަރެއްގެ ބޮޑު ޗުއްޓީއާ ދިމާކޮށް ގިނަ ބަޔަކު ލަންކާއަށް ދެ އެވެ.
ސްރީލަންކާއަށް ދިޔަ ދިވެހިންގެ އަދަދު އިތުރުވެފައިވާއިރު، އެ ގައުމުގައި ދިރިއުޅޭ ދިވެހިންނަށް މިހާރު ވަނީ ދަތިތަކާ ކުރިމަތިލާން ޖެހިފަ އެވެ. މި މައްސަލަ ދިމާވީ ސްރީ ލަންކާގައި އަނިޔާވެރި ގޮތަކަށް މަރާލާފައި އޮއްވާ ފެނުުނު، ހ. ހަންޑްރެޑް ފްލާވާ، ހުސެން ރަޒީން (ރަބަރޭ) މަރާ ގުޅިގެން ނެވެ. މި މައްސަލައާ ގުޅުންހުރި ދިވެއްސެއް ވަނީ ލަންކާއިން ހައްޔަރުކޮށްފަ އެވެ. އެ ގައުމަށް ދާ ދިވެހިން އެއާޕޯޓްސްގެ ކަސްޓަމްސްގައި އިތުރަށް ބަލައި ފާސްކުރުމުގެ މަސައްކަތްތަކެއް އަންނަނީ ކުރަމުންނެވެ.