ރައީސް އޮފީހުގެ މައި ދޮރާއްޓަށް ކުޑަކަމުދާން އާންމު މީހަކަށް ފުރުސަތު ލިބުމާ ގުޅިގެން އެ އޮފީހުގެ ސެކިއުރިޓީ އާއި ސީސީޓީވީ ސިސްޓަމްގެ ގާބިލްކަމާ ދޭތެރޭ ކުރީގެ ބްރިގޭޑިއާ ޖެނަރަލް އިބްރާހީމް ދީދީ ސުވާލު އުފައްދަވައިފި އެވެ.
ރައީސް އޮފީހުގެ ގޭޓަށް ކުޑަކަމުދިޔަ މީހާ ވަނީ އޭގެ ކުޑައިރުކޮޅެއް ފަހުން މާލޭގެ ހައިބަތު ބޮޑު ހުކުރު މިސްކިތާއި އިސްލާމީ މަރުކަޒަށް ވެސް ކުޑަކަމުގޮސްފަ އެވެ.
މިދިޔަ އާދީއްތަ ދުވަހު އެ އަމަލު ހިންގީ ނުކުޅެދޭ މީހެއް ކަމަށް ފުލުހުން ބުނެފައިވެ އެވެ. އަދި ފަހުން އެ މީހާ ހައްޔަރު ކުރި ކަމަށް ވެސް ބުންޏެވެ.
އެ ހާދިސާއަށް ފަހު ރައީސް އޮފީހުގެ ސެކިއުރިޓީ ނިޒާމުގެ ތެރޭގައި ބޭނުންކުރާ ސީސީޓީވީ ކެމަރާތަކުގެ ގާބިލްކަމާ ދޭތެރޭ ސުވާލު އުފައްދަވަމުން އިބްރާހީމް ދީދީ ވިދާޅުވީ މީހަކަށް އެ ފުރުސަތު ލިބުމުން އެގެނީ ރައީސް އޮފީހުގެ ބޭރު ފާރުގައި ހުރި "ސީސީޓީވީ އެއީ 'ވާ' ބިރު ގަންނަވަން ހުރި އެއްޗެއް" ކަމަށެވެ.
ރައީސް އޮފީހުގެ ގޭޓަށް ކުޑަކަމުދިއުމަށްފަހު އޭގެކުޑައިރުކޮޅެއް ފަހުން ދެ މިސްކިތަކަށް ކުޑަކަމުދިއުމަށް މީހަކަށް ފުރުސަތު ލިބުމާ ގުޅިގެން އެތައް ބައެއްގެ ފާޑުކިޔުން ސަލާމަތީ ހިދުމަތްތަކަށާއި ކަމާ ގުޅޭ އެހެން އިދާރާތްތަކަށް އަމާޒުވެފައިވެ އެވެ.
އިސްލާމީ މަރުކަޒަށް ކުޑަކަމުގޮސްފައި ވަނީ ވެސް މަޣުރިބް ނަމާދުގެ ވަގުތުގައި އިމާމުގެ ކުރިމައްޗަށްވާ ގޮތަށް އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވެފައިވެ އެވެ.
މީގެ ކުރިން ވެސް ބައެއް މީހުން ވަނީ ރައީސް އޮފީހާއި މިސްކިތްތަކަށް ގެއްލުންދީ އެ ތަންތަނުގެ ހައިބަތާއި ގަދަރު ކުޑަވާ އަމަލުތައް ހިންގާފަ އެވެ.