ވެމްކޯގައި ކުނި ނަގަން ރަޖިސްޓްރީ ކޮށްފައިވާ ގެއަކުން ކުނި ނުނަގާ ހުރި ނަމަ މައުލޫމާތު ހިއްސާކުރުމަށް ހާއްސަ ހޮޓްލައިނެއް ތައާރަފްކޮށްފި އެވެ.
ވެމްކޯ އިން ތައާރަފްކުރި ހޮޓްލައިން ނަންބަރަކީ 7998047 އެކެވެ.
ވެމްކޯ އިން ބުނީ ރަޖިސްޓްރީ ކޮށްފައިވާ ގެއަކުން ކުނި ނުނަގާ ހުރި ނަމަ އެ ނަންބަރަށް އެންގުމަށް އެދޭ ކަމަށެވެ.
ވެމްކޯ އިން ކުނި ނުނަގާ ނަމަ އެ މައުލޫމާތު ހިއްސާކުރުމަށް ހޮޓްލައިނެއް ތައާރަފްކޮށްފައި މިވަނީ ރަޖިސްޓްރީ ކޮށްފައިވާ ބައެއް ގެތަކުން ކުނި ނުނަގާތީވެ އާންމުންގެ ޝަކުވާ ވަރަށް ބޮޑުވެފައި ވަނިކޮށެވެ.
ވެމްކޯ އިން ބުނީ ހޮޓްލައިންގެ ސަބަބުން ކަސްޓަމަރުންނަށް ހިދުމަތް ފޯރުކޮށްދޭ ގޮތް ކައިރިން މޮނީޓާ ކުރުމަށް ފަސޭހަތަކެއް ލިބޭނެ ކަމަށެވެ.
ވެމްކޯ އިން ކޮވިޑްގެ ކުރިން އިމާރާތްތަކުގެ އެޕާޓްމަންޓްތަކުގެ ދޮރުމަތިން ކުނި ނެގި ނަމަވެސް ފަހުން ކޮވިޑްގެ ހާލަތު ގޯސްވުމުން ކުނި ނެގީ އިމާރާތްތަކުގެ ކުރުމަތިން މަގުމަތިންނެވެ.
ވެމްކޯ އިން އެގޮތަށް އަމަލުކުރަން ފެށުމުން ބައެއް މީހުން ވަނީ ވެމްކޯ އަށް މަހު ފީ ދެއްކުން ހުއްޓާލާފަ އެވެ. އެކަމަކު ކޮވިޑްގެ ހާލަތު ރަނގަޅުވުމުން ވެމްކޯ އިން ވަނީ މަގުމަތިން ކުނި ނެގުން ހުއްޓާލުމަށްފަހު މިދިޔަ މަހުގެ 15 ވަނަ ދުވަހު އަލުން އިމާރާތްތަކަށް ވަދެ އެޕާޓްމަންޓުތަކުގެ ދޮރުމަތިން ކުނި ނަގަން ފަށާފަ އެވެ. އަދި ކުނި ނަގަން ރަޖިސްޓްރީ ނުކުރާ ގޭބިސީތަކުންނާއި ފީ ނުދައްކާ ގޭބިސީ ތަކުން އެކަން ކުރުމަށް ވެމްކޯ އިން ވަނީ އެދިފަ އެވެ.
ކޮންމެ ގޭބީސީއަކުން ދުވާލަކު އުކާލެވޭނެ ކުނީގެ އަދަދުވެސް ވެމްކޯއިން މިއަދު ވަނީ ހަމަޖައްސާފަ އެވެ. އެގޮތުން އުކާލެވޭނީ ދުވަހު ކުނީގެ މިންގަނޑަށް ފެތޭ 40 ލީޓަރު ސައިޒްގެ ތިން ޑަސްބިން ކޮތަޅުގެ ކުނި ނުވަތަ ކަޅު ޑަސްބިން ކޮތަޅުގެ 120 ލީޓަރުގެ ކުންޏެވެ.