ޓީމުގައި ތިބޭ ހުރިހާ ކުޅުންތެރިން ވެސް ތިބެން ޖެހޭނީ އުފަލުން، ހިތްހަމަ ޖެހިފައި ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ ބުނީ ޓީމުގައި ތިބޭ ހުރިހާ ކުޅުންތެރިން އުފާވެފައި ނޫން ގޮތަކަށް ތިބެ، ކަންތައްތައް ހިނގާ ނަމަ، އެ ކުޅުންތެރިޔަކާއި، ޓީމަށް ވެސް އެންމެ ރަނގަޅު ވާނީ އެކުޅުންތެރިއެއް ބޭނުން ގޮތަކަށް ކަންތައްތައް ނިންމައި ދިނުން ކަމަށެވެ. މިގޮތަށް ގާޑިއޯލާ ވާހަކަ ދައްކާފައި ވަނީ ސިޓީގެ ފޯވާޑް ރަހީމް ސްޓާލިން އެ ޓީމު ދޫކޮށްލަން ބޭނުންވާ ކަމަށް ބުނުމުންނެވެ.
ސްޓާލިން ބުނީ އެހެން ދިމާލަކަށް ދާން ހުރި ފުރުސަތުތައް ބަލަމުން ގެންދާ ކަމަށެވެ. މި ސީޒަން ފެށުނު ފަހުން ލީގުގައި ސިޓީން ކުޅުނު ހަތް މެޗުގެ ތެރެއިން ސްޓާލިންއަށް ފުރަތަމަ 11 އިން ޖާގަ ލިބުނީ ދެ މެޗުގަ އެވެ.
ޓީމުގެ އެއްވެސް ކުޅުންތެރިއަކަށް ވަކި ވަރަކަށް ދަނޑު މަތީގައި މިނެޓު ހޭދަ ކުރަން ދެވޭނެއޭ އޭނާއށް ނުބުނެވޭނެ ކަމަށް ވެސް ގާޑިއޯލާ ބުންޏެވެ. ކުޅުންތެރިންނަށް ފުރުސަތު ދެނީ ދަނޑު މަތީގައި ދައްކާ ކުޅުމުންކަން ފާހަގަ ކުރަމުން ގާޑިއޯލާ ބުނީ "ކުޅުންތެރިން އަބަދު ވެސް ވާހަކަ ދައްކަން ޖެހޭނީ ދަނޑު މަތީގައި. އެއީ އެންމެ ރަނގަޅު ވަގުތު" ކަމަށެވެ.
ސްޓާލިންއަށް ޓީމުގެ ފުރަތަމަ 11 އިން ޖާގަ ނުލިބިގެން އެކަމާއި ހިތްހަމަ ނުޖެހުން ފާޅު ކޮށްފައި ވާއިރު، އެ ޓީމުގެ ކުރިއަށް ކުޅޭ ފަސް ކުޅުންތެރިން އެ ތިއްބެވެ. އޭގެ ތެރޭގައި ހިމެނެނީ ފިލް ފޯޑެން އާއި ގެބްރިއަލް ޖެސޫސް އާއި ރިޔާދް މަހްރޭޒް އަދި ފެރަން ޓޮރޭސްްގެ އިތުރުން ޖެކް ގްރީލިޝް އެވެ.
މިހާރު ފުރަތަމަ 11 އިން ބަރާބަރަށް ޖާގަ ހޯދަމުން އަންނަ ޓޮރޭސްއަށް އިންޓަނޭޝަނަލް ބްރޭކުގައި އަނިޔާ ވުމުން ކުރިއަށް ހުރި ސިޓީގެ މެޗު ތަކުގައި ސްޓާލިންއަށް ފުރުސަތު ލިބުން ގާތެވެ. ޓޮރޭސްގެ އަނިޔާއިން ސަލާމަތްވެ އަލުން ކުޅުމާއި ބައިވެރިވާން ތިން މަސް ދުވަސް ނަގާނެ ކަމަށް ގާޑިއޯލާ ބުންޏެވެ.
އެހެން ވެއްޖެ ނަމަ މިއަންނަ މަހު ވޯލްޑް ކަޕް ކޮލިފިކޭޝަންގައި ގްރީސް އާއި ސްވިޑެންއާއި ދެކޮޅަށް ސްޕެއިން ކުޅޭ މެޗުގައި ޓޮރޭސްއަށް ބައިވެރި ނުވެވޭނެ އެވެ.