އދ.ގެ އާންމު މަޖިލީހުގެ ރައީސްގެ މަގާމު ފުރުއްވަމުން ގެންދަވާ ރާއްޖޭގެ ފޮރިން މިނިސްޓަރު އަބްދުﷲ ޝާހިދު ފޮރިން މިނިސްޓަރު ކަމުން ވަކިކުރަން ސުޕްރީމް ކޯޓަށް ދާނެ ކަަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެ އެވެ.
ޖާބިރު މިހެން ވިދާޅުވީ ފޮރިން ސާވިސްގެ ބިލާ ގުޅޭ ގޮތުން މިއަދު މަޖިލީހުގައި ކުރިއަށް ދިޔަ ބަހުސްގައި ވާހަކަ ދައްކަވަމުންނެވެ.
ޖާބިރު ވިދާޅުވީ ފޮރިން މިނިސްޓަރަކު ނެތި ރާއްްޖެ ހިންގާކަން މިހާރު ސާފުވެއްޖެ ކަމަަށެވެ. އެއީ ޖޯކެއް ނޫންތޯއޭ ވިދާޅުވެ ސުވާލު ވެސް އުފެއްދެވި އެވެ.
ފޮރިން ސާވިސްގެ ބިލެއްގެ ވާހަކަ ދައްކަވާއިރު ފޮރިން މިނިސްޓަރު ނެތުމުގެ ކަންބޮޑުވުން ވެސް ޖާބިރު ފާޅުކުރެއްވި އެވެ. އަދި ބޭރު ދުނިޔެއާ ރާއްޖެ ގުޅުވައިދޭ ބޭފުޅަކީ ފޮރިން މިނިސްޓަރު ކަމަށްވާ އިރު ފޮރިން މިނިސްޓަރު ނެތި ގައުމު ހިންގަން ޖާގަ ނުދިނުމަށް އޭނާ އެދިވަޑައިގެންނެވި އެވެ.
"ރާއްޖެއަކީ މިނިވަން ސޮވަރިން ގައުމެއް. މި ގައުމުގެ ފޮރިން މިނިސްޓަރު ގޮސް އދ. ގައި ކިހިނެއްގޭ މިގައުމު ފޮރިން މިނިސްޓަރު ހިންގާނީ. އޭނާ ސުޕްރީމް ކޯޓަށް ގޮސް ބާލާނަން. މި މަޖިލީހުން އޭނާ ބަހައްޓައިގެން ނުވާނެ. މަޖިލިސް މެމްބަރުން ކުށްވެރިވާނެ. މިކަމާ މަޖިލިސް މެމްބަރުންނަށް ދައުވާ އަންނާނެ. އަޅުގަނޑު މިދަނީ ސުޕްރީމް ކޯޓަށޭ. އެއީ މި މަޖިލީހުން އޭނާ ވައްކެއް ނުކުރެވޭނެ،" ޖާބިރު ވިދާޅުވި އެވެ.
އދ.ގެ އާންމު މަޖިލީހުގެ ރައީސްގެ ހައިސިއްޔަތުން ޝާހިދު ހަތަރު ދުވަހުގެ ރަސްމީ ދަތުރުފުޅެއްގައި ރާއްޖެ ވަޑައިގަތުމަށް ފަހު ނިއުޔޯކަށް ވަޑައިގަތީ މިމަހުގެ 15 ވަނަ ދުވަހު އެވެ. އަދި އެނބުރި ޝާހިދު ރާއްޖެ ވަޑައިގަންނަވާނެ ދުވަހެއް ފޮރިން މިނިސްޓްރީން އަދި ހާމައެއް ނުކުރެ އެވެ.
