ބޭންކް އޮފް މޯލްޑިވްސް (ބީއެމްއެލް) އިން ކެންސާ ސޮސައިޓީ އޮފް މޯލްޑިވްސް އިން ހިންގާ އާންމުން ހޭލުންތެރި ކުރުވުމުގެ ޕްރޮގްރާމްތަކަށް އެހީތެރިވާން ނިންމައިފި އެވެ.
ބީއެމްއެލް އިން ބުނީ ކެންސާ ސޮސައިޓީން އުރަމަތީގެ ކެންސަރު ހުންނަ މީހުން ހޭލުންތެރިކުރުމަށް ހިންގާ "ޕިންކް ރިބަލް ރަން-ވޯކް" އަށް އެހީތެރިކަން ފޯރުކޮށްދޭން ނިންމާފައިވާ ކަމަށެވެ.
ކެންސާ ސޮސައިޓީން ކެންސަރަށް ހޭލުންތެރިކަން އިތުރުކުރުމަށް ކުރާ މަސައްކަތަށާއި ކެންސަރު ބަލީގައި ފަރުވާ ހޯދަމުންދާ މީހުންނާއި އެމީހުންގެ އާއިލާތަކަށް ފޯރުކޮށްދެމުންދާ ސައިކޯސޯޝަލް ސަޕޯޓުގެ ހިދުމަތްތަކަށް އެހީވުމުގެ ގޮތުން ބޭންކުން އެ ޖަމިއްޔާއަށް 150،000ރ. ހަދިޔާކޮށްފައިވާ ކަމަށް ބޭންކުން ބުންޏެވެ.
ބޭނުންކުން ބުނީ މި އިވެންޓް މި މަސް ނިމެންދެން ކުރިޔަށް ދާއިރު ބައިވެރިންނަށް ކޮންމެ ތަނެއްގައި ހުރެގެންވެސް ވެބްސައިޓް މެދުވެރިކޮށް ރަޖިސްޓާ ކުރުމަށްފަހު ބޭންކުން ކަނޑައަޅާފައިވާ ޕޭމަންޓް ނިޒާމުގެ ދަށުން ކެންސާ ސޮސައިޓީއަށް ފައިސާގެ އެހީތެރިކަން ދެވޭނެ އިންޒިތާމް ހަމަޖެހިފައިވާ ކަމަށެވެ.
މި ޕާޓްނާޝިޕްގެ ދަށުން ކެންސާ ސޮސައިޓީ އިން ވަނީ ބީއެމްއެލް ގެ މުވައްޒަފުންނަށް ހިލޭ ކެންސާ ސްކްރީން ޕްރޮގްރާމެއް ބާއްވާފަ އެވެ. ބަލިން ރައްކާތެރިވުމަށް ޓެސްޓު ކުރުމާއި ބަލި ޖެހުމުގެ ކުރިން ދެނެގަތުގެ މުހިންމުކަން މުވައްޒަފުންނަށް ކިޔާދިނުމަށް މައުލޫމާތު ސެޝަންތަކެއް ހިންގުމަށް ހަމަޖެހިފައިވާ ކަމަށް ވެސް ބޭނުންކުން ބުނެ އެވެ.