އިންޑިއާގެ ހާރިޖީ ސިޔާސަތު ނަމޫނާއަކަށް ބަލައި، އެފަދަ ސިޔާސަތަކަށް އަމަލުކުރުމަށް ރައީސް އަބްދުﷲ ޔާމީން އަވައްޓެރި ހުރިހާ ގައުމުތަކަށް ގޮވާލައްވައިފި އެވެ.
"ސާކް ޗާޓާ ޑޭ"ގެ މުނާސަބަތުގައި ފޮނުއްވި މެސެޖްގައި އިންޑިއާގެ ހާރިޖީ ސިޔާސަތަށް ތައުރީފް ކުރައްވަމުން ރައީސް ވިދާޅުވީ، ހާރިޖީ ސިޔާސަތެއްގައި އެންމެ ބޮޑު އިސްކަމެއްދޭން ޖެހެނީ އަވައްޓެރި ގައުމުތަކާއެކު އޮންނަ ގުޅުން ރަނގަޅުކުރުމަށް ކަމަށެވެ. ރާއްޖޭގެ ހާރިޖީ ސިޔާސަތަކީ ވެސް އެފަދަ ސިޔާސަތެއް ކަމަށާއި، ރާއްޖެއިން އަބަދުވެސް މަސައްކަތްކުރަނީ އަވައްޓެރި ގައުމުތަކާ އެކު ގުޅުން ރަނގަޅުކޮށް ގުޅިގެން އެކުގައި މަސައްކަތްކުރުމަށް ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި އިންޑިއާގެ ބޮޑު ވަޒީރު ނަރެންދްރަ މޯދީ އަކީ އަވައްޓެރި ގައުމުތަކާ އެކު ގުޅުން ބަދަހިކުރުމުގައި ނަމޫނާ ބޭފުޅެކެވެ. އެހެންކަމުން މޯދީގެ ހާރިޖީ ސިޔާސަތަކީ ނަމޫނާ ސިޔާސަތެއްގެ ގޮތުގައި ގައުމުތަކުން ބަލައި، އެގޮތަށް އަމަލުކުރަން ޖެހޭ ކަމަށް އެމަނިކުފާނު ވަނީ ވިދާޅުވެފަ އެވެ.
ރައީސް ވިދާޅުވީ ވަކިވަކި ގައުމުތަކުގައި އަމަން ގާއިމް ކުރެވޭނީ ސަރަޙައްދީ އަމާންކަން ޔަގީންކުރެވިގެން ކަމަށެވެ. ސާކްގެ ގައުމުތަކަށް ތިމާވެށީގެ ނުރައްކަލާއި، ހަނގުރާމައާއި ޓެރަރިޒަމްގެ ނުރައްކާތަކާއި ބިރު އޮތްކަން ފާހަގަކުރައްވައި ރައީސް ވިދާޅުވީ، ސަރަހައްދީ ތަރައްގީ ހޯދޭނީ އެ މައްސަލަތައް ހައްލުކުރުމަށް ގުޅިގެން މަސައްކަތް ކޮށްގެން ކަމަށެވެ.
"ޓެރަރިޒަމްގެ ބިރާއި، ހައްދުފަހަނަޅާދިއުމުގެ މައްސަލަތައްވެސް މިއަދު ބޮޑުވެފައިވާކަން ރައީސުލްޖުމްހޫރިއްޔާ ފާހަގަ ކުރައްވާފައިވެއެވެ. އަދި، ސަރަޙައްދީ ތަރައްޤީ ހޯދަން ބޭނުންނަމަ، މިފަދަ ބޮޑެތި މައްސަލަތައް ޙައްލުކުރުމަށްޓަކައި ހުރިހާ ޤައުމަކުން އަތުގުޅާލައި، އެކުގައި މަސައްކަތްކުރުމުގެ މުހިންމުކަމުގެ މައްޗަށް ރައީސުލްޖުމްހޫރިއްޔާގެ މެސެޖުގައި ބައްލަވާލައްވަމުން، އިންޑިއާގެ ބޮޑުވަޒީރު ނަރެންދަރަ މޮދީގެ ޚާރިޖީ ސިޔާސަތުގައި، އަވަށްޓެރި ޤައުމުތަކާ ގުޅުން ބެދެހިކުރެއްވުމަށް ދެއްވާ އަހައްމިއްޔަތުކަމަށް މަރުޙަބާ ވިދާޅުވަން،" ރައީސް ވިދާޅުވި އެވެ.
އެމަނިކުފާނު ވަނީ ސާކުގެ އުސޫލުތަކުގައި ހިފައި ސަރަހައްދީ ހަމަޖެހުމަށް ރާއްޖެއިން އަބަދުވެސް މަސައްކަތް ކުރާނެ ކަމުގެ ޔަގީންކަން ދެއްވާފަ އެވެ. އަވައްޓެރި އެހެން ގައުމުތަކުންވެސް އެ އުސޫލާއި ވިސްނުމުގެ ދަށުން އަމަލުކުރައްވާނެ ކަމަށް ގަބޫލުފުޅުކުރައްވާ ކަމަށްވެސް އެމަނިކުފާނު ވިދާޅުވި އެވެ.
ރައީސް ޔާމީންއާ އެކު އިންޑިއާގެ ބޮޑު ވަޒީރު މޯދީ. -- ފޮޓޯ: އޭޕީ